ސައުދީ އަރަބިއްޔާގައި ބިނާކުރަމުންދާ މުސްތަގްބަލުގެ ޚިޔާލީ ސިޓިއެއް ކަމަށްވާ، ނިއޯމްގެ މަހާ ބޮޑު މަޝްރޫއަކީ ދުނިޔޭގައި އުފައްދާ ދަނގަނޑު އެންމެ ގިނައިން ބޭނުން ކުރަމުންދާ މަޝްރޫޢެވެ. ނިއޯމަށް ދުނިޔޭގައި އުފައްދާ ހުރިހާ ދަގަނޑެއްގެ ފަސްބައިކުޅަ އެއްބައި ބޭނުން ކުރެއެވެ.
މުސްތަގްބަލުގެ ޚިޔާލީ ސިޓީއަކީ ކުރިއަށް އޮތް އެތައް އަހަރެއް ވަންދެން ދަނގަނޑާއި ކޮންސްޓްރަކްޝަން މެޓީރިއަލްގެ ދުނިޔޭގެ އެންމެ ބޮޑު ކަސްޓަމަރަކަށް ވާނެ ކަމަށް ނިއޯމްގެ ޗީފް އިންވެސްޓްމަންޓް އޮފިސަރު މަނާރު އަލްމުނީފް ވިދާޅުވި އެވެ.
ރިޔާޟުގައި ކިންގް އަބްދުالله ފައިނޭންޝަލް ޑިސްޓްރިކްޓްގައި ބޭއްވި ގްލޯބަލް ލޮޖިސްޓިކްސް ފޯރަމްގައި ވާހަކަ ދައްކަވަމުން އެކަމަނާ ވިދާޅުވީ، 500 ބިލިއަން ޑޮލަރުގެ ނިއޯމް މަޝްރޫއަކީ ކުރިއަށް އޮތް އަހަރުތަކުގައި ދުނިޔޭގެ ލޮޖިސްޓިކްސް ދާއިރާ ކުރިއަށް ގެންގޮސްދޭނެ އެންމެ ބޮޑު ކަސްޓަމަރަށް ވާނެ ކަމަށެވެ.
ސައުދީ އަރަބިއްޔާގެ ހުޅަނގު އުތުރުގައި ސަހަރާގައި ބިނާ ކުރަމުން ދާ ނިއޯމަކީ ސައުދީ އަރަބިއްޔާގެ އިގްތިސާދީ ތަރައްގީގެ މަޝްރޫއުތަކުގެ އެންމެ އަގު ބޮޑު މަޝްރޫއެވެ. މި މަޝްރޫއަށް ލަސްކަމެއް ކުރިމަތި ވެފައި ވަނީ، ސައުދީ އަރަބިއްޔާގައި ކުރިއަށްދާ އުމްރާނީ ތަރައްޤީގެ އެހެން މަޝްރޫޢުތަކާ ހެދިއެވެ. އޭގެ ތެރޭގައި 2030އަށް ނިންމުމަށް ކަނޑައަޅާފައިވާ ވޯލްޑް އެކްސްޕޯ އާއި 2034 ވަނަ ބާއްވަން ހަމަޖެހިފައިވާ ވޯލްޑް ކަޕްގެ މަޝްރޫޢުތައް ނިންމުން ހިމެނެއެވެ. އަދި ތެލުގެ އަގު ދަށްވުމާއި ރިޔާޟްގައި ހިންގާ މަޝްރޫއުތަކަށް ފައިސާ ހަމަޖެއްސަން ޖެހޭތީ، ސައޫދީ ސަރުކާރަށް ކޮންމެ ވަރެއްގެ ޕްރެޝަރުތަކެއް ކުރިމަތިވެ ބައެއް މަޝްރޫއުތައް ލަސްވެފައި ވެއެވެ.
ނިއޯމްގެ މަޝްރޫއުތަކުގެ ތެރޭގައި ހިމެނެނީ، 2045 ވަނަ އަހަރަށް ނިންމާ 170 ކިލޯމީޓަރުގެ ދިގުމިނުގެ މީހުން ދިރިއުޅޭ އާބާދީއެއް އޮންނަ ލައިނެކެވެ. މި އޮލަނބަށް ރޮނގެއް ހެން، ދަމާފައި އޮންނަ ސިޓީގެ ފުރަތަމަ ބަޔަކީ 5 ކިލޯމީޓަރެވެ. އެ ބައި ނިންމުމަށް ހަމަޖެހިފައި ވަނީ 2030އަށެވެ.
އޭގެ އިތުރުން އެތާގައި އެހެން މަޝްރޫޢުތަކެއްވެސް ހިމެނެއެވެ. އެއީ، ޓްރޯޖެނާ ވިންޓާ ރިސޯޓާއި އަދި މެގްނާ ކިޔާ 12 ލަގްޒަރީ ރިސޯޓަކާއި ސިންދަލާ އައިލެންޑް ރިސޯޓާއި އޮކްސަގަން ކިޔާ ސިނާއީ ސިޓީއެއް ވެސް ނިއޯމްގެ މަޝްރޫއުތަކުގައި ހިމެނެ އެވެ.
