އިންޑިއާއިން 5ޖީ ޓެކްނޮލޮޖީ ރޯލްއައުޓުކޮށް، އާބާދީގެ 80 ޕަސެންޓް ކަވަރުކޮށްފިއެވެ. ނިއުދިއްލީގައި އޮތް، ޓެލެކޮމިއުނިކޭޝަންއާ ބެހޭ، ގްލޯބަލް ސްޓޭންޑަރޑް ސިމްޕޯޒިއަމްގައި އިންޑިއާގެ ހާލަތު ބަޔާން ކުރާ ކަރުދާސް ހުށަހަޅަމުން، އިންޑިއާ ސަރުކާރުން ބުނެފައި ވަނީ 22 މަސް ދުވަސް ތެރޭގައި، އިންޑިއާގެ 36 ސްޓޭޓާއި ޔޫނިއަން ޓެރިޓްރީގައި 5ޖީ ތައާރަފްކުރުމުން، މުޅި ޤައުމުގެ ސަރަހައްދުގެ 98 ޕަސެންޓަށް މިހާރު 5ޖީ ލިބޭ ކަމަށެވެ.
އިންޑިއާއިން ލަފާކުރާ ގޮތުގައި 5ޖީ އާއެކު، 2040އަށް އިންޑިއާގެ އިޤްތިޞާދަށް 450 ބިލިއަން ޑޮލަރު އިތުރު ވެގެންދާނެއެވެ. އަދި ސިއްހީ ފަރުވާގެ ދާއިރާއާއި ތައުލީމާއި ދަނޑުވެރިކަމާއި އުފެއްދުންތެރިކަމުގެ ދާއިރާއިން ތަފާތު ފުރުސަތުތައް ފަހިވާނެ ކަމަށް އިންޑިއާއިން ބުނެއެވެ. އަދި 5ޖީއަކީ ހަމައެކަނި އިންޓަރނެޓެއް ނޫންކަމާއި އެއީ، ސްމާޓް ސިޓީތަކާއި، ކުރިއަރާފައިވާ އިންފްރާސްޓްރަކްޗަރތަކާއި، އޮޓޮނޮމިކް އިނޮވޭޝަންތަކުގެ ބިންގާއެއް ކަމަށްވެސް ބުނެއެވެ.
އިންޑިއާއިން ވަނީ، 5ޖީއާއި، އާޓިފިޝަލް އިންޓެލިޖެންސް (އޭއައި)، އަދި އިންޓަނެޓް އޮފް ތިންގްސް (އައިއޯޓީ) ފަދަ ޓެކްނޮލޮޖީތަކުގެ ފުރިހަމަ ބޭނުން ގައުމުތަކަށް ލިއްބައި ދިނުމަށާއި ގައުމުތަކުގެ މެދުގައި ޓެކްނޮލޮޖީގެ ތަފާތުކަން ކަނޑުވާލުމަށް، ބައިނަލްއަގްވާމީ އެއްބާރުލުން އިތުރު ކުރުމަށް ގޮވާލާފައެވެ. އަދި ކުރިއަށް ރޯލްއައުޓު ކުރަން އޮތް 6ޖީ ޓެކްނޮލޮޖީ ފަދަ އީޖާދީ ޓެކްނޮލޮޖީވެސް އެންމެންގެ އަތްފޯރާ ފަށަށް އަންނަ ގޮތަށް ބައިނަލްއަގްވާމީ ސިޔާސަތުގެ އޮނިގަނޑެއް އެކުލަވާލުމަށް ވެސް ގޮވާލާފައިވެ އެވެ.
