އެމެރިކާއިން ދީފައިވާ ހަތިޔާރު ބޭނުންކޮށްގެން ހަނގުރާމައިގެ ޖަރީމާތައް ހިންގަމުން ގެންދާ އިޒްރޭލަށް އަރަބި އަޚުން އަސްކަރީ ގޮތުން ދަތިކުރުމުގެ ފިޔަވަޅު އެޅުމަށް ތުރުކީ ރައީސް ގޮވާލައްވައިފިއެވެ. އަންކަރާގައި، އަރަބި ލީގްގެ ސެކްރެޓަރީ ޖެނަރަލް އަޙުމަދު އަބޫ ޣައިސާއެކު އޮތް ބައްދަލު ވުމެއްގައި ރަޖަބު އެރުދޮޣާން ގޮވައިލެއްވީ، ޢަރަބިން ވެގެން އިޒްރޭލަށް ހަތިޔާރު ސަޕްލައި ކުރުން ހުއްޓާލުމަށެވެ.
ނަސްލު ނައްތާލައި ހަނގުރާމައިގެ ޖަރީމާތައް ހިންގުމަށް އެމެރިކާއިން އިޒްރޭލަށް ސަޕްލައި ކުރާ ހުރިހައި ހަތިޔާރަކީ، އަރަބި ސަރަހައްދުތަކާއި އަރަބި ބަނދަރުތަކާއި އަރަބިން ކޮންޓްރޯލު ކުރާ ކަނޑުމަގުން ލައިގެން ގެންދާ ހަތިޔާރު ތަކެވެ.
އިޒްރޭލާއެކު ވިޔަފާރި ގުޅުން ބާއްވައި، އިޒްރޭލަށް ތެލާއި ދަނގަނޑު ސަޕްލައި ކުރާ ތުރުކީގެ ރައީސް ވަނީ، ދުނިޔޭގެ މަސްރަހުގައި ހިނގަމުންދާ ކަންތައްތަކާއި، މެދުއިރުމަތީގެ ސަރަހައްދީ ކަންކަމާ ބެހޭ ގޮތުން ވެސް މިބައްދަލުވުމުގައި މަޝްވަރާ ކުރައްވާފައެވެ.
ތުރުކީއަކީ ފަލަސްތީނަށް ސަޕޯޓު ކުރާ ޤައުމެކެވެ. ނަމަވެސް އަދި މިހާތަނަށް ތުރުކީން ވަނީ އަނގަބަހުގެ ޖިހާދީ ވަރުގަދަ ސަޕޯޓެއް ފަލަސްތީނަށް ދީފައެވެ.
މިސްރުގައި މައި އޮފީސް ހުންނަ އަރަބި ލީގްގެ ސެކްރެޓަރީ ޖެނަރަލް އަންކަރާގައި ގޮވައިލެއްވީ، އިޒްރޭލުން ހިންގާ ޖަރީމާތަކަށް އިޒްރޭލު ޖަވާބުދާރީ ކުރުވުމަށެވެ.
މިސްރަކީ، ކޭމްޕް ޑޭވިޑް މުއާހަދާގައި ބަޔާން ކޮށްފައިވާ މިސްރާއި ފަލަސްޠީނާ ދެމެދު އޮންނަ ސަރަހައްދު ވަކިކުރާ، ފިލަޑެލްފިޔާ ކޮރިޑޯ އިޒްރޭލުން ހިފައި އެތާނެގެ ކޮންޓްރޯލު ނެގުމުން އިޒްރޭލަށް ފިޔަވަޅެއް އަޅަން ނުކެރުނު ޤައުމެވެ.
އެރުދުޣާން ވިދާޅުވީ ޔަހޫދީން ބޭނުންވާ ގޮތަށް ބިންތައް ހިފުމަށްފަހު އެންމެ ފަހުން ޒަޔަނިސްޓުން އަމާޒު ކުރާނީ އިޒްރޭލަށް ކަމަށެވެ. ނަމަވެސް އެފަދަ ޙާލަތެއްގައި ތުރުކީން ޢަމަލު ކުރާނެ ގޮތެއް އޭނާ ވިދާޅެއް ނުވެއެވެ.
