އިންޑިއާގައި މިހާރު ހުންނެވި ކުރީގެ ބޮޑުވަޒީރު ޝެއިޚް ހަސީނާ ހައްޔަރު ކުރުމުގެ އަމުރެއް ބަންގްލަދޭޝްގެ އިންޓަނޭޝަނަލް ކްރައިމްސް ޓްރައިބިއުނަލުން ބުރާސްފަތި ދުވަހު ނެރެފިއެވެ. މި އަމުރަކީ، އިންސާނިއްޔަތާ ދެކޮޅު ޖަރީމާތައް ހިންގާފައިވާ ކަމުގެ ތުހުމަތުގައި ނެރެފައިޥާ އަމުރެކެވެ. މިއަހަރުގެ ކުރީކޮޅު ފެށި މުޒާހަރާތައް ކޮންޓްރޯލު ކުރުމުގައި ގިނަ ބަޔަކު މަރާލުމުގައި ޙަސީނާ ބައިވެރިވެ ވަޑައިގަތް ކަމަށް ތުހުމަތު ކޮށްފައި ވެއެވެ.
ދައުލަތުގެ ވޒީފާތައް ދިނުގައި ހަސީނާއާއި ޕާޓީގެ ގާތް ފަރާތްތައް އިސްކުރުމަށް އެކުލަވާލި ގާނޫނާ ދެކޮޅަށް ޒުވާނުން ކުރި މުޒާހަރާތަކަކީ، 1971 ވަނަ އަހަރު ބަންގާޅު މިނިވަންވި ފަހުން ހިނގި އެންމެ ނުރައްކާތެރި ހަމަނުޖެހުންތަކެވެ. މި ހަމަނުޖެހުންތަކުގައި 700 އަށް ވުރެ ގިނަ މީހުން މަރުވެ އެތައް ބަޔަކު ޒަހަމްވި އެވެ.
މި ހަމަނުޖެހުންތަކާ ހެދި، އެންމެ ފަހުން އޮގަސްޓް މަހުގެ ފަސް ވަނަ ދުވަހު ބޮޑު ވަޒީރު ހަސީނާ އިންޑިއާއަށް ފިލައްލަވަން ވަޑައިގަތުމަށް މަޖުބޫރުވިއެވެ.
އެމެރިކާއިން އަޑީގައި އޮވެގެން ހިންގާފައިވާ ސަރުކާރު ވައްޓާލުމުގެ ހަރަކާތެއްކަމަށް ތުހުމަތު ކުރެވޭ މި ބަދަލަށްފަހު، އެމެރިކާގެ ގާތް ބޭފުޅެއް ކަމަށްވާ މުހައްމަދު ޔޫނުސް ވަގުތީ ސަރުކާރެއް އެކުލަވާލެއްވިއެވެ.
ފަނޑިޔާރު ޣުލާމް މުރުތަޟާ މާޒޫމްދާރް ރިޔާސަތު ބަލަހައްޓަވާ ހަނގުރާމައިގެ ޖަރީމާތައް ބަލާ ޓްރައިބިއުނަލްގެ ޝަރީއަތުގެ މަޖިލީހުގައި ޕްރޮސެކިއުޓަރު މުހައްމަދު ތާޖުލް އިސްލާމް ވަނީ ހަސީނާއާއެކު 50 މީހަކު ހައްޔަރު ކުރުމުގެ އަމުރަކަށް ހުށަހެޅުއްވުމުން ކޯޓުން ވަނީ އަމުރު ދީފައެވެ.
ކޯޓުން އިތުރަށް އަންގާފައި ވަނީ ނޮވެމްބަރު 18 ގެ ކުރިން ހަސީނާ ހައްޔަރުކޮށްގެން ކޯޓަށް ހާޒިރު ކުރުމަށެވެ.
ހަސީނާ އާއި އޭނާގެ އަވާމީ ލީގު ޕާޓީގެ އެހެން ލީޑަރުންނާ ދެކޮޅަށް 60 އަށް ވުރެ ގިނަ ދައުވާ ހުށަހަޅާފައިވެ އެވެ.
