އިޒްރޭލަށް ހަތިޔާރު ސަޕްލައިކޮށްދީ، މެދުއިރުމަތީގައި ޓެރަރިސްޓް ހަމަލާތައް ހިންގުމަށް އިޒްރޭލަށް ފަހި ކޮށްދިން ފަރާތަކީ އެމެރިކާގެ ރައިސް ޖޯ ބައިޑެން އެވެ. ޒަޔަނިސްޓުންގެ ޓެރަރިޒަމަށް ބައިޑެން ވާގިވެރި ވުމުގެ ސަބަބުން އެމެރިކާގައި ދިރިއުޅޭ ޕާކިސްތާން ދަރިކޮޅުގެ މީހުން ވަނީ އެމެރިކާގެ ރިއާސީ އިންތިޚާބުގައި ކުރީސް ޓްރަމްޕަށް ސަޕޯޓު ކުރުމަށް ނިންމާފައެވެ.
އޭގެ އިތުރުން ޕާކިސްތާނުން ވަނީ އެންމެނަށް އެއް ވަރަކަށް ޤާނޫނުގެ ބާރު ހިނގަންވާނެ ކަމަށް ބުނާ ބައިނަލްއަޤްވާމީ އުޞޫލު މާނަކޮށްދިނުމަށް އދގައި އެދިފައެވެ.
ޒަޔަނިސްޓުން ހިންގާ "ނަސްލު ނައްތާލުމުގެ ހޮލޮކޯސްޓް ހަނގުރާމަ"އަށް އިޝާރާތް ކޮށް ޕާކިސްތާނުގެ ދާއިމީ މަންދޫބު ސަފީރު މުނީރު އަކްރަމް ވިދާޅުވީ ލޮލުގެ ކުރިމަތީގައި މި ފެންނަނީ ބައިނަލްއަގްވާމީ ފެންވަރުގައި "ގާނޫނުގެ ވެރިކަން" ނަގާލަމުންދާ މަންޒަރު ކަމަށެވެ.
އިޒްރޭލުގެ އަމަލުތަކުން ބައިނަލްއަގްވާމީ އިންސާނީ ގާނޫނާ ޚިލާފްވާތަންވެސް ފެންނަ ކަމަށާއި ހަތިޔާރު ކޮންޓްރޯލްކުރުމާއި ހަތިޔާރު ނައްތާލުމުގެ މުއާހަދާތަކާއި ސިލްސިލާކޮށް ޚިލާފުވެ ތިމާމެން ހިފާފައިވާ ބިންތަކުގައި ހިމެނޭ ރައްޔިތުންގެ އިންސާނީ ހައްގުތަކަށް އަރައިގަނެ، ބޮޑެތި ގެއްލުންތަކެއް ދެމުންދާ މަންޒަރު ވެސް އަބަދު ފެންނަމުންދާ ކަމަށެވެ.
އިޒްރޭލުން ހިންގާ ހުރިހައި ޓެރަރިސްޓް އަމަލެއްގައި ބޭނުން ކުރަމުންދަނީ އެމެރިކާއިން ދީފައިވާ ހަތިޔާރެވެ. އިޒްރޭލަކީ މެދުއިރުމަތީގައި ހުޅަނގުން ބޭނުންވާ ހަނގުރާމަތައް ކުރާ ޕްރޮކްސީ ވަކީލެވެ.
