ކޮމާންޑަރު ޔަޙުޔާ އިބްރާހީމް ސިންވާރު، ޝަހީދު ކުޅައުމާ ގުޅިގެން ފަލަސްޠީނުގެ ސަރުކާރުން ފާތިޙާ ކިޔަވައި ތައުބީނުގެ ޖަލްސާއެއް ބާއްވައިފިއެވެ. ރާމަﷲގައި ފަލަސްޠީނު ސަރުކާރު ހިންގާ އިމާރާތުގައި ބާއްވާފައިވާ ޖަލްސާގައި އިސްވެ އިންނެވީ ފަލަސްޠީނުގެ ރައީސް މަޙުމޫދު ޢައްބާހެވެ.
އައްބާސްގެ ސަރުކާރުން ވަނީ ޔަޙުޔާ ސިންވާރަށް ޝަހީދެއްގެ ދަރަޖަ ދީފައެވެ. އަދި ސިންވާރަކީ، ފަލަސްޠީނުގެ މިނިވަންކަމަށް މަސައްކަތް ކުރެއްވި ހިތްވަރުގަދަ ލީޑަރެއް ކަމަށްވެސް ސިފަ ކޮށްފައި ވެއެވެ.
ޔަޙުޔާ ސިންވާރަކީ، 7 އޮކްޓޫބަރުގައި 3 ހާސް މުޖާހިދުންނާއެކު، ޒަޔަނިސްޓުން ފަލަސްޠީނުގެ ބިންތައް ހިފައިގެން ދަމާފައިވާ ކަށިނަރުތައް ފޫއަޅުވާލައި، ވަދެގަނެ، ގަދަ ބާރުން ބިން ފޭރިގެން ތިބި ޒަޔަނިސްޓު ޔަހޫދީ މީހުން ހަނގުރާމައިގެ އަސީރުންގެ ގޮތުގައި ހައްޔަރުކޮށް، ޣައްޒާއަށް ގެނައި އޮޕަރޭޝަންގެ ކޮމާންޑަރެވެ.
އެހަމަލާގައި އިޒްރޭލު ސިފައިން ދިން، ހެނިބަލް ޕްރޮޓޮކޯލުގެ ނަމުން މަޝްހޫރު ހަމަލާގައި ޒަޔަނިސްޓުން ވަނީ، 1600 ޒަޔަނިސްޓުންގެ ތެރޭން ގިނަ ބަޔަކު އަންދާލައި، މަރާލާފައެވެ. ހަނގުރާމައިގެ އަސީރުންގެ ގޮތުގައި ހިފައިގަތް 251 މީހުންގެ ތެރޭން 97 މީހުން އަދިވެސް ހަނގުރާމައިގެ އަސީރުންގެ ގޮތުގައި ޙަމާސްއިން ގެންގުޅެއެވެ.
އިޒްރޭލާއެކު ވިޔަފާރީގެ ގުޅުން ބާއްވާ ތުރުކީގައިވެސް ޚާރިޖީ ވަޒީރު ހާކާން ފިދާން ވަނީ، އަންކަރާގެ ހަމާސް އޮފީހުގެ މަސްއޫލުވެރިންނާ ބައްދަލު ކުރައްވައި ތުރުކީގެ ތަޢުޒިޔާ ރައްދު ކުރައްވާފައެވެ.
