އެމެރިކާގެ ޖާސޫސީ އިދާރާ ސީއައިއޭއިން ކޮމާންޑަރު ޔަޙޫޔާ ސިންވާރު ހޯދުމަށް ޚާއްސަ ޔުނިޓެއް އުފައްދައި އިޒްރޭލަށް ކޮމާންޑޯންގެ ފައުޖެއް ފޮނުވިކަމަށް ނިއުޔޯކް ޓައިމްސްއާއި ސިއެންއެންއިން ބުނެއެވެ.
ސިންވާރުގެ 7 އޮކްޓޫބަރުގެ އޮޕަރޭޝަނަށް ފަހު މެދުއިރުމައްޗަށް އިތުރު އެތައް އެޖެންޓުންނެއް ފޮނުވައިގެން ސިންވާރާ ބެހޭ މަޢުލޫމާތު ހޯދަން މަސައްކަތް ކޮށްފައިވާ ކަމަށްވެސް ރިޕޯޓުކޮށްފައި ވެއެވެ.
"އަހަރެއް ވަންދެން އެވެރިން ހުރިހައި ހަކަތައެއް ދުއްވާލީ ސިންވާރު ހޯދުމުގައި" ސީއެންއިން ބުންޏެވެ. އެމެރިކާ އެޖެންޓުންވެސް ވަނީ ސިންވާރުގެ ހިތްވަރުގަދަ ކަމަށް ތަޢުރީފުކޮށްފައެވެ. "މަރަށް ފަސްޖެހުމެއް ނެތި، ފަހު ނޭވާއާ ޖެހެންދެންވެސް އޭނާ ދިޔައީ ހަނގުރާމަ ކުރަމުން" އެމީހުންނާ ހަވާލާދީ ސީއެންއެންއިން ރިޕޯޓު ކުރިއެވެ.
މި ކަމާ ބެހޭ ގޮތުން ނިއުޔޯކް ޓައިމްސްއަށް މައުލޫމާތު ދިން މަސްއޫލުވެރިން ބުނެފައި ވަނީ އެމެރިކާ ޖާސޫސުން ބޭނުން ކުރި އެމްކިޔު 9 ރީޕާ ޑްރޯން އިން ވަނީ ބައެއް ހަނގުރާމައިގެ އަސީރުން ބަތިއްބާފައިވާ ތަންތަން ހޯދައިދީ އެމައުލޫމާތު ޒަޔަނިސްޓުންނަށް ފޯރުވައިދީފައެވެ. މިއީ 36 ގަޑި އިރުވަންދެން، އުދުހުމުގެ ގާބިލުކަން ލިބިފައިވާ ބޮޑެތި ގެއްލުން ދޭ ވައްތަރުގެ ޑްރޯންތަކެވެ.
