މުޒާހަރާ ކުރާމީހުންނަށް ފިޔަވަޅު އެޅުމާއި، ހިނގާލުންތައް ހުއްޓުވައި، މަނާކުރުމާއި، މީޑިއާގެ މަސައްކަތްތެރިންނަށް ނުރައްކާ ކުރުން ފަދަ އަމަލުތަކުން ހުޅަނގުގެ ޤައުމުތަކާއި ޒަޔަނިސްޓް އިޒްރޭލުން މިނިވަންކަމާ ޚިޔާލު ފާޅު ކުރުމާ ދެކޮޅަށް ފިޔަވަޅުތައް އަޅާކަމަށް އދގެ ތަޖުރިބާކާރަކު ތުހުމަތު ކުރައްވައިފިއެވެ.
"މިފަހު ޒަމާނުގައި، ޣައްޒާގެ މައްސަލައިން ކުރިމަތިވިހާ ސީރިއަސްކޮށް ޣައްޒާއިން ބޭރުގައި ހިޔާލުފާޅުކުރުމުގެ މިނިވަންކަމަށް ނުރައްކަލެއް ކުރިމަތިވެފައެއް ނުވޭ،" އދ.ގެ ޚާއްސަ ރެޕަޓުއާ އައިރީން ޚާން ނޫސްވެރިންނަށް ވިދާޅުވި އެވެ..
2020ން ފެށިގެން، ޚިޔާލުފާޅުކުރުމުގެ މިނިވަންކަމާއި އިންސާނީ ހައްގު ކުރިއެރުވުމުގެ މަސައްކަތުގައި ޚާއްސަ ރެޕަޓުއާއެއްގެ ގޮތުގައި މަސައްކަތް ކުރައްވާ ބަންގްލަދޭޝްގެ އިންސާނީ ހައްގުތަކާ ބެހޭ ތަޖުރިބާކާރު ވަކީލު އައިރީން ޚާން ވިދާޅުވީ މިހާރު ފެންނަނީ އާދަޔާ ޚިލާފް މަންޒަރެއް ކަމަށެވެ.
އެމެރިކާގެ ޔުނިވާސިޓީ ކެމްޕަސްތަކުގައި މުޒާހަރާތައް ކުރުން ހަނިކޮށް "ހަރުކަށިކޮށް" ގަވާއިދުތައް ހަދާފައިވާ ކަމަށްވެސް އޭނާ ވިދާޅުވި އެވެ.
ޔޫރަޕްގައި ޖަރުމަނުވިލާތުން މިދިޔަ އޮކްޓޯބަރު މަހު ފަލަސްތީނަށް ތާއީދުކުރާ މުޒާހަރާތައް މަނާކުރިކަން ފާހަގަކުރައްވަމުން، އޭނާ ވިދާޅުވީ ދުވަހަކުވެސް އިޒްރޭލަށް ތާއިދު ކުރާ މުޒާހަރާތަކާ ދެކޮޅަށް ޖަރުމަނުން ފިޔަވަޅެއް ނާޅާ ކަމަށެވެ.
"ޝިއާރުތައް ގެންގުޅުން ނުވަތަ ފަލަސްޠީނުގެ ސްކާފް ގެންގުޅުމަށް ވެސް ހުރަސްތަކެއް އަޅާފައި އެބަހުރި،" އައިރީން ޚާން ވިދާޅުވި އެވެ.
މިފަދަ ހަރުކަށި ފިޔަވަޅުތަކެއް އެޅުމަށް ފްރާންސުން މިދިޔަ އަހަރު މަސައްކަތް ކުރިނަމަވެސް، ކޯޓުތަކުން ވަނީ އެކަމަށް ހުރަސް އަޅާފައެވެ.
އަދި ކެނެޑާއާއި ބެލްޖިއަމްގައިވެސް މިފަދަ ހުރަސްތަކެއް އަޅާފައިވާ ކަމަށާއި ނަމަވެސް ބައެއް ހާލަތްތަކުގައި ހުއްދަ ދޭކަމަށް ވިދާޅުވިއެވެ.
ޒަޔަނިސްޓުން ހިސާރަ ކޮށްފައިވާ ޣައްޒާ އާއި ހިފާފައިވާ ހުޅަނގު އައްސޭރީގައި "ނޫސްވެރިންނަށް އަމާޒުކޮށްގެން (ޒަޔަނިސްޓުން) ނޫސްވެރިން މަރާލަމުންދާ" ކަމަށް ވެސް އޭނާ ވިދާޅުވިއެވެ.
"އަޅުގަނޑުމެން އެންމެންނަށްވެސް އެނގޭ ގަސްތުގައި ނޫސްވެރިއަކު މަރާލުމަކީ ހަނގުރާމައިގެ ޖަރީމާއެއްކަން،" މި ފަހުން ހިނގާ ހަމަނުޖެހުންތަކާއި އަމަލުތަކުގައި މިކަން ކުރާ މީހުން "އަދަބު ނުލިބޭތީ" ބިރަކާނުލައި އެފަދަ ކަންކަން ކުރާކަމަށްވެސް އޭނާ ވިދާޅުވި އެވެ.
ނޫސްވެރިން މަރާލުމާއި، ނޫސްވެރިންގެ ވަސީލަތްތައް ނައްތާލުމާއި، ބައިނަލްއަގްވާމީ މީޑިއާތަކުން ރިޕޯޓު ކުރުމަށް އިންކާރުކުރުމާއި، އަލްޖަޒީރާ ނެޓްވާކު މަނާކުރުމާއި، އިޒަރޭލުން ހިންގާ އެހެނިހެން އަމަލުތަކަކީ "ފާޑުކިޔާ ނޫސްވެރިންގެ އަޑު ކަނޑުވާލައި، ބައިނަލްއަގްވާމީ ޖަރީމާތައް ޑޮކިއުމެންޓު ކުރުމަށް ހުރަސްއެޅުމަށް އިޒްރޭލުން ގެންގުޅޭ ސްޓްރެޓެޖީއެއް ކަމަށް ފެނޭ" އައިރީން ޚާން ވިދާޅުވިއެވެ.
