މެދުތެރޭ ޣައްޒާގެ އަލްއަޤްސާ ޝަހީދު ހޮސްޕިޓަލަށް އަމާޒުކޮށްގެން ޒަޔަނިސްޓުން ދިން ހަމަލާއެއްގައި ޒަޚަމްވެފައިވާ ބަލިމީހުން ދިރިތިއްބާ އަންދާލާފައިވާ މަންޒަރު ފެންނަ ވީޑިއޯތަކުން އާންމުން ސިއްސުވާލައިފިއެވެ.
ޣައްޒާގެ އުތުރުގައި ޒަޔަނިސްޓު ސިފައިން ތަކުރާރުކޮށް ފަލަސްޠީނު މީހުން ވަޒަން ދޫކޮށް ދިއުމަށް މަޖުބުރު ކުރުމުން ދޭރުލް ބަލަޙްގެ އަލްއަޤްސާ ޝަހީދު ހަސްފަތާލުގެ ގޯތި ތެރެ ފުރިފައި ވަނީ ރެފިއުޖީންގެ ފޭލިގެތަކުންނެވެ.
ބިރުވެރި ވީޑިއޯތަކުން ފެންނަ ގޮތުގައި ހޮސްޕިޓަލުގެ ގޯތީގައި ވަށައިގެންވާ ފޭލިގެތަކުގައި ހުޅުރޯވެފައި ވެއެވެ. އަންހެނުންނާއި ކުދަކުދިންގެ ހަޅޭއްލެވުމާއި ރުއިމުގެ އަޑު ވީޑިއޯގައި އިވެއެވެ.
އައިވީ ޑްރިޕް ގުޅާފައި ހުރި ފިރިހެނަކު ދިރިހުއްޓާ އަނދާލާފައި މަންޒަރު ފެނެއެވެ. ކައިރީގައި އަންހެނަކާއި ޒުވާން އަންހެން ކުއްޖަކު ވެސް އަނދާފައިވާ ތަން ފެނެއެވެ.
"ހުވައިކޮށްފައި މިބުނަނީ ކުރެވޭނެ އިތުރު އެއްވެސް ކަމެއް ނެތް! އަލިފާންގަނޑު ނިއްވާލެވޭކަށް ވެސް ނެތް! ފެނެއް ވެސް ނެތް! ސިވިލް ޑިފެންސަސް ވެސް ނުވަދެވޭނެ! ހުވާ ކޮށްފަ ބުނަން! ކުރެވޭނެ އެއްވެސް ކަމެއް ނެތް! ކުރިމަތީގައި މީހުން ދަނީ އަނދަމުން!" އެތާގެ ކުރިމަތީގައި ހުރެގެން ޣައްޒާގެ ނޫސްވެރިޔާ ޞާލިޙް އަލްޖަޢުފަރާވީ ރިޕޯޓު ކުރަމުން ދިޔައެވެ. ޙަމަލަ ދީފައި ވަނީ މެންދަމުން އަނބުރާ 2 ޖެހިތަނާއެވެ.
އެމެރިކާއިން ދީފައިވާ ހަތިޔާރު ބޭނުންކޮށްގެން ޒަޔަނިސްޓުން ވަނީ އަބަދުވެސް ހަސްފަތާލުތަކާއި ސްކޫލުތަކަށް ހަމަލަ ދީފައެވެ.
