އެއީ ދުޝްމަނުންގެ ލަގަން ބާރުގެ ދަށަށް ގެނަސް، ވަލުފަރާތުގައި އެ ސޮރު ބަނދެލުމަށް އެޅި ފިޔަވަޅެކެވެ. އަދި ނަތަންޔާހޫ ފަދަ މުޖުރިމު ބުޗަރަކަށް ބޭނުންހައި ގޮތަކަށް ނޫޅެވޭނެ ކަމާއި އިންސާފު އަރައި ހަމަކުރާނެކަމާއި ސަރަހައްދާއި ދުނިޔޭގައި ނުލަފާއަރުވަމުން ނޫޅެވޭނެ ކަން ދައްކައި ދިނުމުގެ ފިޔަވަޅެކެވެ. އޭނާގެ ޖަރީމާތަކަށް އަދަބެއް ނުވަތަ އިޤާބެއް ނުލިބި ނޫޅެވޭނެ ކަމަށާއި އޭނާގެ ބޮލުގެ އަގަކީ، ދެކުނު ލުބުނާނުގެ ދެކޮޅުވެރި ހަނގުރާމަވެރިން ފޮނުވާލާ ޑްރޯނެއް ކަން އޭނާއަށް އަންގައި ދިނުމެކެވެ.
ފިލްމެއްގެ މަންޒަރަކާ އެއްފަދަ ޑްރާމާއެއްގައި، ލުބުނާނުގެ ދެކުނުން، ޒަޔަނިސްޓު ދުޝްމަނާ 70 ކިލޯމީޓަރު ދުރުން ފޮނުވާލި ކުޑަ ޑްރޯނެއް ދަތުރުކޮށްފައި، ހިފާފައިވާ ބިންތަކުގެ ވައިގެ ސަރަހައްދުގައި ގަޑިއެއްހާއިރު ހޫރެމުން، އެސޮރަށް ހުރަސް އަޅަން އުޅުނު އެންމެ މޮޅެތި އަޕާޗޭ ހެލިކޮޕްޓަރުތައް ރެކެމުން ގޮސް، ވެއްޓިގަތީ، ސީދާ ހައިފާގެ ހުޅަނގު ދެކުނުގައި އޮންނަ ޤައިސަރިއްޔާ އަވަށަށެވެ. އިޒްރޭލުގެ ބޮޑުވަޒީރު ނަތަންޔާހޫގެ ގޭގެ މައްޗަށެވެ. އެއީ ޒަޔަނިސްޓުންނާ ކުރިމަތިލާން ފަށާފައިވާ ދިގު ތާރީޚުގައި ޒަޔަނިސްޓު ބޮޑު ވަޒީރުގެ ގެއަށް ހަމަލަ ދިން ފުރަތަމަ ފަހަރެވެ.
އެ ހާދިސާއާ ގުޅިގެން، އާދައިގެ މަތިން، އިޒްރޭލު މީޑިއާއިން އަމަލު ކުރާފަދައިން އެތެރޭގައި ކަމެއް ހިނގިކަން މީހުންނަށް ކިޔައިދޭން ރައްޔިތުންގެ ސިކުނޑި ތައްޔާރުކޮށްލިއެވެ. އެހެންވެ، ރިޕޯޓުކޮށްފައި ވަނީ، ނަތަންޔާހޫގެ ގެއާ ކައިރި ގެއަކަށް ޑްރޯނެއް ވެއްޓިއްޖެ ކަމަށެވެ. ފަހުން، ނަތަންޔާހޫގެ އޮފީހުން އިއުލާން ކުރީ އޭނާގެ ގެއަށް ޑްރޯނެއް ވެއްޓުނު ކަމަށެވެ. ނަމަވެސް، ހަމަލާ އަމާޒު ކުރި ހިނދު އޭނާވެސް އަދި އޭނާގެ އަނބިގޮއްޔަވެސް އެ ގޭގައި ނެތް ކަމަށެވެ. ހާދިސާއަކީ، ސިއްރު ކުރެވޭ ވަރަށް ވުރެން ބޮޑު ކަމެކެވެ. ބަޔަކަށް ނީވިދާ ވަރަށް ވުރެން ބޮޑު ގޮވުމެކެވެ. އެކަމަކުވެސް އިޒްރޭލުން ދަނީ ތަފްސީލުތައް ސިއްރު ކުރަމުންނެވެ.
މިއިން ޙިޒުބުﷲގެ ކުޅަދާނަކަން ސާބިތުކޮށް ދީފިއެވެ. ހަނގުރާމަވެރިން ސާބިތުކޮށް ދިނީ، އެމީހުން ކުރިންވެސް އިޢުލާން ކޮށްފައިވާ ފަދައިން، އައު ފިޔަވައްސެއް ފެށިފައިވާ ކަމެވެ. ޙިޒުބުﷲގެ ނަޢީމް ޤާސިމް ވަނީ އެކަން ކުރިންވެސް އިޢުލާން ކުރައްވާފައެވެ. ޒަޔަނިސްޓުންގެ ކޮންމެ ފަދަ ތަނަކަށްވެސް ޙަމަލަ ދިނުމުގެ ހައްގު ހަނގުރާމަވެރިންނަށް ލިބިގެންވާ ކަމަށް އޭނާ ވިދާޅުވިއެވެ.
އެއީ ހައްގު ތެދެއްކަން ހަނގުރމަވެރިން ސާބިތުކޮށްދީފިއެވެ. މި ފިޔަވައްސަކީ ދުޝްމަނަށް ތަދު އިހުސާސް ކޮށްލުމުގެ މަރުޙަލާއެއް ނޫން ކަން ސާބިތު ކޮށްދީފިއެވެ. މިއީ ބޮލު ރިއްސުވާލުމުގެ މަރުހަލާއެވެ. ޒަޔަނިސްޓު މަސްއޫލުވެރިން ފުރާނައާ މެދު ސަމާލުވާން ޖެހޭ މަރުހަލާއެވެ. އެންމެ މަތިން، ނަތަންޔާހޫއިން ފެށިގެންނެވެ. އޭނާގެ އަމާންކަން ނިގުޅައި ލައިފިއެވެ. އޭނާއަކީ އޭނާގެ ފަސްފަހަތުން ހަނގުރާމަވެރިން އުޅޭނެ މީހެއްކަން ސާބިތުކޮށް ދީފިއެވެ. މުނާސިބު ވަގުތެއްގައި ޝިކާރަ ކުރެވިދާނެކަން ސާބިތުކޮށްދީފިއެވެ. ބިލިއަނުން ދިފާއަށް ޑޮލަރުތައް ހޭދަކޮށްފައިވާ އިރުވެސް ބިތުފަންގި ނެގިފައިވާ ކަމުގެ އިޙުސާސް އޭނާއަށް ކޮށްދީފިއެވެ.
މި އޮޕަރޭޝަނަކީ ރަމްޒީ އޮޕަރޭޝަނެކެވެ. ޤައިސަރިއްޔާއަށް ޑްރޯނެއް ދަތުރުކޮށްފިއެވެ. ހުރަހެއް ނޭޅުނެވެ.
ޤައިސަރިއްޔާ އޮންނަނީ އިޒްރޭލުގެ އެތެރޭގައެވެ. މެޑިޓެރޭނިއަން ކަނޑުގެ އައްސޭރިފަށުގައެވެ. ޓެލްއަވީވާއި ހައިފާއާ ދޭތެރޭގައެވެ. ސްޓްރެޓެޖިކް ތަނެކެވެ. އަސްކަރީ މަރުކަޒުތައް ހުންނަ ތަނެކެވެ. މަސްއޫލުވެރިންނާއި ބޮޑުން ދިރިއުޅޭ މުހިންމު ސިޓީއެކެވެ.
އިޒްރޭލުގެ ޗެނަލް 12 އިން ބުނީ މިއީ ކުރިންވެސް އެމީހުން ލަފާ ކުރި ބިރުވެރި ހާލަތެވެ. މާނައަކީ، އުތުރުގައި ވަޒަންވެރިކޮށްފައިވާ މީހުން އެމީހުންގެ ޔަހޫދީ ބަސްތީތަކަށް އެނބުރި ދިއުމަށް ނަތަންޔާހޫ ބޭނުންވިއަސް އެކަން ނުކުރެވޭނެ ކަމެވެ. ޝަހީދު ހަސަން ނަޞްރަﷲ ވިދާޅުވިހެން، ޒަޔަނިސްޓުންނަށް އަމާން އެއްވެސް ތަނެއް ނޯންނާނެއެވެ.
ނަތަންޔާހޫއަށް ޔަގީންވެ ކަށަވަރު ވެފައި ވަނީ އޭނާގެ ބޮލުގެ އަގަކީ ޙިޒުބުﷲގެ ޑްރޯނެއްގެ އަގު ކަމެވެ.
