ކުރިން މުއްސަނދި ދިރިއުޅުމެއް އުޅުނު ލީބިޔާ މީހުން ފަގީރުވެ، އަތްމަތި ދަތިވުމުން، މަރުހޫމް ރައީސް މުޢައްމަރު ޤައްޒާފީގެ ވެރިކަމުގެ ދުވަސްތައް ހަނދާން ކުރެއެވެ. އެމީހުން ދެކޭ ގޮތުގައި، އެއީ ރައްޔިތުންގެ މެދުގައި އަމާންކަމާއި ސުލްހަވެރިކަން އޮތް ދުވަސްވަރެކެވެ. 42 އަހަރު ވަންދެން "އަނިޔާތަކާއި މަރުގެ އަދަބުތައް" ވެސް ފެނިގެން ދިޔަ ޒަމާނެކެވެ.
ޤައްޒާފީ ޢަވަހާރަކޮށްލައި، މިސްރާތާ ސިޓީގެ މަގުމައްޗަށް އެއްލާލި ހިތާމަވެރި ހާދިސާއަށް 13 އަހަރު ފަހުން ވެސް އޭނާގެ އިދިކޮޅު ފަރާތްތަކާއި ސަޕޯޓަރުންގެ ހަނދާނުގައި އަދިވެސް ޤައްޒާފީއަކީ ބައެކެވެ.
އިދިކޮޅު ފަރާތްތަކުން ވެސް ޤަބޫލު ކުރާ ގޮތުގައި ލީބިޔާއަށް ބޭނުންވާ ޢުމްރާނީ ތަރައްޤީގެ އެއްވެސް މަޝްރޫޢެއް ކުރިއަށް ނުގެންދަވައި، ޤައްޒާފީ ދޫކޮށްލައްވާފައެއް ނުވެއެވެ. ޤައުމު ބިނާ ކުރުމަށް މަސައްކަތް ކުރެއްވިނަމަވެސް ސިޔާސީ ނިޒާމާއި މުސްތަޤްބަލުގެ ލީޑަރޝިޕެއް ބިނާ ކުރެއްވުމަށް ޤައްޒާފީ މަސައްކަތެއް ނުކުރައްވާކަމަށް އެފަރާތްތަކުން ދެކެއެވެ.
ޤައްޒާފީގެ ވެރިކަމުގައި ގޭގެ ކުލި ދައްކާކަށް ނުޖެހެއެވެ. އެންމެނަށް ބޯހިޔާވަހިކަން ލިބެއެވެ. އަދި ކަރަންޓު ބިލު ދައްކާކަށްވެސް ނުޖެހެއެވެ.
ސަޕޯޓަރުން ބުނާ ގޮތުގައި ޤައްޒާފީއަށް ތާއީދުކޮށް އޭނާގެ ހަނދާންތައް އައު ކުރަން ޖެހޭ ކިތަންމެ ކަމެއް ޤައްޒާފީ ލީބިޔާ މީހުންނަށް ކޮށްދެއްވާފައި ވެއެވެ. އޭގެ ތެރޭގައި ލީބިޔާއަކީ މުސްތަޤިއްލު އަމިއްލަވަންތަކަން ލިބިގެންވާ ޤައުމެއް ކަމުގައި ޤައްޒާފީ ހައްދަވައި ދެއްވިކަން އެފަރާތްތަކުން ޤަބޫލު ކުރެއެވެ.
ޤައްޒާފީ ވެރިކަމަށް ވަޑައިގަތީ، 1969 ވަނަ އަހަރުގެ ސެޕްޓެމްބަރު މަހުގެ 1 ވަނަ ދުވަހުގެ އިންގިލާބަށް ފަހު އެވެ. އޭނާ ވަނީމ ލީބިޔާގައި ވަކި ހިތްޕައިގެން ތިބި، އިސްތިއުމާރީ ބާރުތައް ކަމަށްވާ، އިނގިރޭސިންނާއި އެމެރިކާ ސިފައިން ލީބިޔާއިން ބޭރުކޮށްލައްވާފައެވެ. އޭގެ ކުރިން ލީބިޔާގެ ވިޔަފާރިއާއި އާންމު ދިރިއުޅުން ކޮންޓްރޯލު ކުރަމުން ދިޔަ 30،000 އަށް ވުރެ ގިނަ އިޓަލީ މީހުން ބޭރުކޮށްލެއްވިއެވެ. އެމީހުންނަކީ ލީބިޔާގެ ދަނޑުވެރިކަމުގެ ހުރިހައި ސަރަހައްދެއް ކޮންޓްރޯލު ކުރި މީހުންނެވެ.
ޤައްޒާފީގެ ވެރިކަން މަތިން މީހުން އެންމެ ބޮޑަށް ހަނދާނަށް އަންނަނީ، އޭނާގެ ވެރިކަމުގައި ކާބޯތަކެތީގެ އަގު ހެޔޮވުމެވެ. އަދި ބޮލަކަށް ޖެހޭ އެވަރެޖު އާމްދާނީ އިތުރު ވުމެވެ. ބޯހިޔާވަހިކަމާއި ތަޢުލީމު ޢާންމު ކުރައްވައި އެކަންކަން ހިލޭ ކޮށްދެއްވުމުންނެވެ.
ޤައްޒާފީއާ ދެކޮޅަށް އެންމެ ބޮޑަށް ފާހަގަ ކުރެވެނީ، ދެކޮޅުވެރިން ފިއްތުމާއި ޖަލަށް ލުމާއި އެމީހުން މެރުމެވެ.
