މޫސާގެ ފާނުގެ އަސާކޮޅުން ފިރުޢައުނާއި ޖާދޫގަރުންގެ ހިތްތަކަށް ބިރުވެރިކަން ގެނަސްދިން ފަދައިން، ކޮމާންޑަރު ޔަޙުޔާ އިބްރާހީމް ސިންވާރުގެ އަސާކޮޅުންވެސް ޒަޔަނިސްޓު ޓެރަރިސްޓް ޔަހޫދީން ބިރު ގަންނަވާލާފައި ވެއެވެ.
"މިނިވަނުން ގަދަބާރުން ހިންހިފާ ޢަދުއްވުންނާ ކުރިމަތި ލުމުގައި އެންމެ ފަހު ވަގުތުވެސް ބޭނުން ކުރި އަސާ (ލަޓިބުރީ) ގެ ބައެއް ކަމުގައި ވިކަމަށްޓަކައި އަހަރަމެން ފަޚުރުވެރިވާ" އަބޫ ޠާހާގެ ޢާއިލާއިން އިންސްޓަގްރާމްގައި ކުރި ޕޯސްޓެއްގައި ބުނެފައި ވެއެވެ. އަބޫ ޠާހާ ޢާއިލާގެ ގެއަކީ ކޮމާންޑަރު ސިންވާރުގެ ޙަޔާތުގެ އެންމެ ފަހު ވަގުތުކޮޅު ހޭދަ ކުރެއްވި ގެއެވެ.
އެ ޢާއިލާގެ އިސްފަރާތް ކަމަށްވާ އަބޫ ޠާހާ ކިޔައިދިން ގޮތުގައި އެމީހުން އެގެއިން ނިކުންނަން މަޖުބުރުވިރު، ގެ ހުރީ ރަނގަޅު ޙާލަތެއްގައެވެ. އެ ގެއަކީ އޭނާއާއި އޭނާގެ އަޚުން ވެގެން 54 ހާސް ޑޮލަރު ހޭދަކޮށްގެން ބިނާ ކޮށްފައިވާ ގެއެކެވެ.
އަބޫ ޠާހާގެ ގެއަކީ، ޣައްޒާގެ ދެކުނުގައި އޮންނަ ރަފަހު ސިޓީގެ ހުޅަނގުން ސުލްތާން އަވަށުގައި، އިބްނު ސީނާ މަގުގައި ހުންނަ ގެ އެކެވެ.
15 އަހަރު ވަންދެން އެ ގޭގައި ދިރިއުޅުމަށްފަހު އެތަން ދޫކޮށް ދިއުމަށް އެ އާއިލާއަށް މަޖުބޫރުވީ، މިއަހަރުގެ މޭ މަހުގެ 6 ވަނަ ދުވަހު ކަމަށް އެއާއިލާއިން ކިޔައި ދެއެވެ.
