އޮސްޓްރޭލިޔާއިން ބުނަނީ ޒަޔަނިސްޓުން ޣައްޒާއަށް ހަމަލަ ދޭން ފެށިފަހުން ކެންބަރާއިން ޒަޔަނިސްޓުންނަށް ހަތިޔާރު ސަޕްލައި ކޮށްފައި ނުވާނެ ކަމަށެވެ. އަދި އޭގެ ކުރިން ޒަޔަނިސްޓުންނަށް ވިއްކުމަށް ހަމަޖައްސާފައި އޮތް، އަސްކަރީ ސާމާނާ ބެހޭ 66 އަސްކަރީ އެކްސްޕޯޓް ހުއްދައެއް ކުރިއަށް ގެންދިއުމާ މެދު އަލުން މުޠާލިޢާ ކުރަމުންދާ ކަމަށް އޮސްޓްރޭލިއާ ޑިފެންސް މިނިސްޓްރީން ބުނެއެވެ.
ދިފާޢީ ވުޒާރާއިން ދަނީ ވަކި ވަކި ހާލަތަށް ބަލައިގެން، އިންސާނީ ހައްގުތަކާ ގުޅޭ ޙާލަތަށް ރިޢާޔަތްކޮށް، އޮސްޓްރޭލިއާގެ ބައިނަލްއަގްވާމީ ވާޖިބުތަކުގެ އަލީގައި އަލުން ހުއްދަ ދިނުމާ މެދު ވިސްނަމުން ކަމަށް ބުނެއެވެ.
އޮސްޓްރޭލިއާއިން މި ހުއްދަތައް މުރާޖަޢާ ކުރަން ފެށީ، އޮސްޓްރޭލިއާގެ ސެންޓަރ ފޯ އިންޓަނޭޝަނަލް ޖަސްޓިސް އިން އޭޕްރީލް މަހު ޑިފެންސް މިނިސްޓަރު ރިޗާޑް މާލްސް އަށް ހުށަހެޅި އިލްތިމާސަކަށް ފަހު އެވެ. އެއަށްފަހު އޮސްޓްރޭލިއާއިން ވަނީ، ފަލަސްޠީނުގައި އިންދާފައިވާ ޒަޔަނިސްޓުންނަށް ހަތިޔާރު ސަޕްލައި ކުރާ ހުރިހައި ހުއްދައެއް ބާޠިލު ކޮށްފައެވެ.
