ޗައިނާއިން ޓައިވާނާ ދެކޮޅަށް އަސްކަރީ ފިޔަވަޅެއް އަޅާނަމަ ޗއިނާގެ މުދަލަށް ނަގާ ޓެކްސް އިތުރު ކުރުމަށް އެމެރިކާގެ ރިޕަބްލިކަން ޕާޓީގެ ރިޔާސީ ކެންޑިޑޭޓް އަދި ކުރީގެ ރައީސް ޑޮނަލްޑް ޓްރަމްޕް ގޮވާލައްވައިފިއެވެ. ޓްރަމްޕް ވިދާޅުވީ، އެމެރިކާއަށް ޗައިނާއިން އެކްސްޕޯޓު ކުރާ މުދަލަށް "150 ޕަސެންޓާއި 200 ޕަސެންޓާ ދެމެދުގެ" ޓެކްސްތަކެއް އޭނާގެ ވެރިކަމުގައި ނަގާނެ ކަމަށެވެ.
ދާދިފަހުން ދިން އިންޓަވިއުއެއްގައި ޓްރަމްޕާ ސުވާލުކޮށްފައިވަނީ ޗައިނާއިން ޓައިވާން ހިސާރު ކޮށްފިނަމަ، އެމެރިކާއިން އަސްކަރީ ބާރު ދައްކާތޯ އެވެ. އޭގެ ޖަވާބުގައި އޭނާ ވިދާޅުވީ، އެފަދަ ފިޔަވަޅެއް އަޅަން ނުޖެހޭނެ ކަމަށާއި ޗައިނާގެ ރައީސް ޝީ ޖިންޕިންގް އޭނާއަށް އިހުތިރާމް ކުރައްވާ ކަމަށެވެ.
"އޭނާ އަޅުގަނޑަށް އިޙުތިރާމް ކުރަނީ އަޅުގަނޑު މޮޔައެއް ކަމަށް ދެކެވަޑައިގަންނަވާތީ" ޓްރަމްޕް ވިދާޅުވިއެވެ.
2017 އިން 2021 އަށް ރައީސްކަން ކުރެއްވި ޓްރަމްޕް މީގެ ކުރިން ވަނީ ޗައިނާއާ ދެކޮޅަށް ހަރުކަށި ސިޔާސަތެއް ގެންގުޅުއްވާފައެވެ. އަދި ޗައިނާއާ ދެކޮޅަށް ވިޔަފާރީގެ ހަނގުރާމައެއް ކުރައްވައި، ދުނިޔޭގެ އިގްތިސާދަށް ފުޅާ ދާއިރާއެއްގައި އަސަރުތަކެއް ކުރި އެތައް ބުރެއްގެ ޓެރިފްތަކެއް ޓްރަމްޕް ވަނީ ޗައިނާއާ ދެކޮޅަށް އަޅުއްވާފައެވެ.
އެ އިންޓަވިއުގައި ޓްރަމްޕް ވަނީ ޔޫކްރޭންގައި ހިނގަމުންދާ ހަމަނުޖެހުންތަކާ ގުޅޭގޮތުންވެސް ވާހަކަ ދައްކަވާފައެވެ.
"އަޅުގަނޑު ޕޫޓިންއަށް ދެންނެވިން، 'ވްލަޑިމިއާ، އަޅުގަނޑުމެންގެ ގުޅުމަކީ ވަރަށް މުހިންމު ގުޅުމެއް. ވްލަޑިމިއާ، ޔޫކްރޭން ފަހައި ދުއްވާނަމަ، އަޅުގަނޑުވެސް ނިކަން ބާރަށް ޖަހާނަމޭ! ގަބޫލެއް ވެސް ނުކުރެއްވޭނެއޭ! އަޅުގަނޑު ހަމަލާ އަމާޒު ކުރާނީ ސީދާ މޮސްކޯގެ މެދަށޭ" ރަޝިއާ ރައީސަށް ވިދާޅުވިކަމަށް ޓްރަމްޕް ވިދާޅުވިއެވެ.
ޓްރަމްޕް ވަނީ އޭނާ އިންތިޚާބު ވެއްޖެނަމަ، ގާތްގަނޑަކަށް އިމްޕޯޓްކުރާ ހުރިހާ މުދަލުން 10 ޕަސެންޓާއި 20 ޕަސެންޓާ ދެމެދަށް އިމްޕޯޓް ޓެރިފް ބޮޑު ކުރުމަށް ހުށަހަޅުއްވާފައެވެ.
