އެމެރިކާގެ ޗިޕް އުފެއްދުމުގެ ސާމާނު ޗައިނާގެ ވާވޭ ޓެކްނޮލޮޖީސްއަށް ވިއްކައި ސަޕްލައި ކުރާ ފަރާތްތަކަށް ހުރަސް އެޅުމަށް އެމެރިކާގެ ގާނޫނު ހަދާ މަޖިލީހުގެ މެމްބަރުން ދަނީ އެމެރިކާގެ ރައީސް ޖޯ ބައިޑަންގެ ސަރުކާރަށް ފިއްތަމުންނެވެ.
އެމެރިކާގެ ހައުސް އޮފް ރެޕްރެޒެންޓޭޓިވްސްގެ ޗައިނާ ސެލެކްޓް ކޮމިޓީގެ ލީޑަރުން އެމެރިކާގެ ސެކްރެޓަރީ އޮފް ކޮމާސް ޖީނާ ރެއިމޮންޑޯއަށް ފޮނުވި ސިޓީއެއްގައި ބުނެފައި ވަނީ ވާވޭއަށް މުހިންމު ޓެކްނޮލޮޖީ ލިބޭތީ އެމެރިކާ ގާނޫނު ހަދާ މަޖިލިސް މެމްބަރުން ކަންބޮޑުވާ ކަމަށެވެ.
ވާވޭއަކީ، އައިޕޯނު ލޯންޗު ކުރި ދުވަހުގެ ފަހު ދުވަހު، އެއަށްވުރެން މޮޅު ފޯނެއް ނެރުނު ކުންފުންޏެވެ.
އެ ސިޓީގައި ބުނެފައި ވަނީ، ވާވޭގެ "ސިއްރު ނެޓްވޯކެއް" އޮންނަ ކަމަށާއި އެ ވިއުގައިގައި، މެމްބަރުންގެ ގޮތުގައި ޝެންޒެން ޕެންގްސިންކްސޫ ޓެކްނޮލޮޖީއާއި ޝެންޒެން ސްވޭޝުއާ ޓެކްނޮލޮޖީއާއި އަދި ކިންޑާއޯ ސިއެން ޓެކްނޮލޮޖީއާއި ޗައިނާގެ ބައެއް އިތުރު އެހެން ކުންފުނިތައް ވެސް ހިމެނޭ ކަމަށެވެ.
އެމެރިކާއާއި އެމެރިކާގެ އެކުވެރި ގައުމުތަކުން ވަނީ ޗައިނާއަށް އެންމެ ޒަމާނީ ޗިޕްތަކާއި އެތަކެތި އުފެއްދުމުގެ ވަސީލަތްތައް ވިއްކުން ހަނިކޮށްފައެވެ. އަދި، ޗިޕް އުފެއްދުމަށް ބޭނުންވާ މެޓީރިއަލްއާއި ސާމާނު ވިއްކާ އެމެރިކާގެ ކުންފުނިތަކާއި، ޗިފް އުފެއްދުމަށް ބޭނުންވާ މެޝިން އުފައްދާ ނެދަލެންޑްސް އާއި ޓޯކިޔޯގެ ކުންފުނިތަކަށްވެސް އެތަކެތި ނުވިއްކޭ ގޮތް ހަދާފައެވެ.
މީގެ އިތުރުން ވޮޝިންޓަނުން ވަނީ ޗައިނާގެ އެކި ކުންފުނިތަކާ ދެކޮޅަށް އެތައް ބުރަކަށް، ދަތިކުރުމުގެ ފިޔަވަޅުތައް އަޅާފައެވެ.
އެމެރިކާގެ ދަތިކުރުމުގެ ލިސްޓުގައި ނުހިމެނޭ ޗައިނާގެ ކުންފުނިތަކަށް އެމެރިކާގެ ރުހުމާ ނުލައި ފެންވަރު މަތީ ޗިޕް އުފައްދާ އެހެން އިކުއިޕްމަންޓްތައް ބޭނުން ނުކުރެވޭ ގޮތް ހެދުމަށްވެސް އެ ސިޓީގައި އެދިފައި ވެއެވެ.
"ވާވޭ، އަދި އެފަދަ ކުންފުނިތަކަށް އެމެރިކާގެ ޓެކްނޮލޮޖީ ބޭނުން ކުރުމުގެ ގާބިލްކަން ލިބި ނުދިނުމަށް ކުރާ މަސައްކަތުގައި އަޅުގަނޑުމެން ބާރަށް ކުރިއަށް ދާން ޖެހޭނެ." ކޮމިޓީގެ ޗެއާމަން ޖޯން މޫލެނާރް އަދި ކޮމިޓީގެ އިސް މެމްބަރު ރާޖާ ކްރިޝްނާމޫރްތީގެ ސިޓީގައި ލިޔުއްވާފައިވެ އެވެ. ޕްރޮޕެގެންޑާއާއި ވިޔަފާރީގެ ދަތިކުރުމަކީ އެމެރިކާގެ ޚާރިޖީ ސިޔާސަތުގެ މުހިންމު ދެ ތަނބެވެ.
