ކޮމާންޑަރު ޝަހީދު ޔަހުޔާ އިބްރާހީމް ސިންވާރުގެ މައްޗަށް ކަށުނަމާދު ނުކުރުމަށް ސަޢޫދީ ޢަރަބިއްޔާގެ މުފްތީ އެންގެވިބާ؟ މީސްމީޑިއާގައި އަނބުރަމުން ގެންދާ ފަތުވާ، ސަޢޫދީ މުފްތީ އައްޝައިޚު ޢަބްދުލްޢަޒީޒު ޢާލުއްޝައިޚަށް ނިސްބަތްކޮށް ބުނެފައި ވަނީ، ކޮމާންޑަރު ސިންވާރުގެ މައްޗަށް ކަށުނަމާދު ކުރުން ޖާއިޒު ވެގެނެއް ނުވާނެ ކަމަށެވެ. އެހެނީ، އޭނާ ވަނީ ރާފިޟީންގެ މަޒުހަބަށް ތަބާވެފައި ކަމަށެވެ!
މީސްމީޑިއާގައި ސަޢޫދީ މުފްތީ އަށް ނިސްބަތްކޮށް، މި މޭރުމުން ފަތުވާއެއް އަނބުރަމުން ގެންދާތީ، ހަލި ނިއުސް ޓީމުން އެކަމުގެ ހަޤީޤަތް ހޯދާލީމެވެ.
ހަލި ނިއުސް ޓީމުން ފެކްޓްޗެކްކޮށްލުމުން އެނގުނީ، ފަޟީލަތުލްމުފްތީއަށް ނިސްބަތްކޮށްފައިވާ ބަޔާނަކީ، ތޫނުސްގެ "ރަޞަދު ޓިއުނީޝިއާ" ވެބްސައިޓުގައި ޝާއިއުކޮށްފައިވާ ވާހަކައެއް ކަމަށެވެ. އަދި އެ ވެބްސައިޓަށް ގޮސްގެން ބެލުމުން އެނގުނީ، އެފަދަ ވާހަކައެއް އެވެބްސައިޓްގައި އެއްވެސް އިރެއްގައި ޝާއިޢުކޮށްފައި ނުވާ ކަމެވެ. ނަމަވެސް އެއީ އެބްސައިޓަށް ނިސްބަތްކޮށް، މުފްތީއަށް ހުތުރު އެރުވުމަށް ބަޔަކު މީހުން އަނބުރަމުން ގެންދާ ފޭކް ގްރެފިކެއް ކަމަށެވެ.
އޭގެ އިތުރުން މި ހޯދުން ތަކުން ހަލި ނިއުސްގެ ޓީމަށް އިތުރު އެހެން ކަމެއްވެސް ފާހަގަ ވިއެވެ.
ސަޢޫދީ ޢަބްދުﷲ ރަސްގެފާނު 23 ޖަނަވަރީ 2015ގައި އަވަހާރަވުމުން ކޮމާންޑަރު ސިންވާރަށް ނިސްބަތްކޮށްފައިވާ ބަޔާނެއް މީސްމީޑިއާއިން ފާހަގަވިއެވެ. އެ ބަޔާނުގައި ކޮމާންޑަރަށް ނިސްބަތްކޮށް ބުނެފައި ވަނީ ޢަބްދުﷲ ރަސްގެފާނަށް ޖަނާޒާ ނަމާދު ކުޅައުން ހުއްދައެއް ނުވާނެ ކަމަށެވެ. އަދި ރަސްގެފާނަކީ ކާފަރެއް ކަމަށާއި ސައޫދީ ރައްޔިތުންވެސް ރަސްގެފާނަށް ބައިޢަތު ހިފުމުން ކާފަރު ވެފައިވާ ކަމަށެވެ.
މި ވާހަކަތައް ޝާއިއުކޮށްފައިވަނީ، ޓީވީއަކުން ނަގާފައިވާ އަލްޖަޒީރާއަށް ނިސްބަތްކޮށް ހަދާފައިވާ ފޭކް، ވީޑިއޯގެ މަންޒަރަކުންނެވެ.
މިކަމުގެ ހަގީގަތް ހޯދާލުމަށް ފެކްޓްޗެކްކޮށްލުމުން އަޅުގަނޑުމެންގެ ޓީމަށް އެނގުނީ އެ ވާހަކައަކީވެސް ފޭކެއް ކަމަށެވެ. އަލްޖަޒީރާގެ އެއްވެސް ސައިޓެއްގައި އެފަދަ ވާހަކައެއް އެއްވެސް އިރެއްގައި ރިޕޯޓެއް ކޮށްފައެއް ނުވެއެވެ. އަދި ކޮމާންޑަރު ސިންވާރަށް ނިސްބަތްކޮށްވެސް އެފަދަ ރިޕޯޓެއް މީޑިއާގައިވެސް ގެނަސްދީފައެއް ނުވެއެވެ.
މީސްމީޑިއާގައި ހުންނަ ވާހަކަތަކުގެ ހަޤީޤަތް ބަލާލުމުން ޒަޔަނިސްޓުންގެ ބައިބައި ކުރުމުގެ ރޭވުންތަކުގެ މޮޅުކަން މި ދެ ހާދިސާއިން އަންގައި ދެއެވެ.
