އިންޑޮނޭޝިއާގެ ރައީސްގެ މަޤާމާ ޙަވާލުވެވަޑައިގަތް އައު ރައީސްގެ ނާއިބް ރައީސަކީ މަޤާމުން ދުރުވެ ވަޑައިގަންނަވާ ޖޯކޯ ރައީސްގެ ދޮށީ ދަރިފުޅެވެ.
ކުރިން ކުޑަ ސިޓިއެއްގައި ފަރުނީޗަރު ވިއްކަން އުޅުއްވި ޖޯކޯއަކީ އާދައިގެ އާއިލާއަކުން އިންޑޮނޭޝިއާގެ ރިއާސަތަށް ވަޑައިގަތް ފުރަތަމަ އާންމު ރައްޔިތު މީހާއެވެ. ވެރިކަމުން އޭނާ ފައިބައި ވަޑައިގަތް އިރު އޭނާގެ ފިރިހެން ދެބޭފުޅުން ދަތުރު ކުރައްވަނީ ޕްރައިވެޓް ޖެޓްތަކުގައެވެ. އެ މައްސަލަތައް ވަނީ އެންޓި ކޮރަޕްޝަން ކޮމިޝަނަށް ވައްދާފައެވެ.
ޖޯކޯގެ ލަދުރަކި ދޮށީ ދަރިފުޅަކީ، އިއްޔެ ހުވައި ކުރެއްވި ރައީސް ޕްރޮބޯވޯގެ ނާއިބް ރައީސެވެ. އޭނާ މަގާމަށް ގެނައުމަށް، 'އަދީބު ކުޅިއެއްގައި' ޤާނޫނުއަސާއަށް ބަދަލު ގެނަސްގެން އުމުރު ހަގުކޮށްފައި ވެއެވެ. މި ދަރިފުޅު، ގިބްރާން އަކީ، ނައިބް ރައީސް ކަމަށް އިންތިޚާބުވުމުގެ ކުރިން ބައްޕައެކޭ އެއްފަދައިން، ކުޑަ ސިޓީއެއްގެ މޭޔަރެކެވެ. އޭގެ ކުރިން އޭނާއަކީ ޗޮކްލެޓް ކޭކާއި ޕެންކޭކް ވިއްކަން އުޅުނު މީހެކެވެ. މާމަގެ ބާރު އެޅުއްވުމުން އޭނާ ބައްޕަގެ ގޮވެއްޔަށް އިޖާބަ ދެއްވައި ސިޔާސީ މައިދާނަށް ނިކުންނެވީއެވެ.
ޖަޒީރާ ޕޮލިޓިކްސްގައި ނެޕޮޓިޒަމަކީ އައު އެއްޗެއް ނޫނެވެ! ގިބްރާންއަށް މަގާމު ލިބިވަޑައިގަތީވެސް ނެޕޮޓިޒަމްގެ ތެރޭންނެވެ.
ރައީސް ޕްރޮބޯވޯ އަކީވެސް ނެޕޮޓިޒަމްގެ އުފެއްދުމެކެވެ. ކުރީގެ މިލިޓަރީ ޖެނަރަލް ޕްރޮބޯވޯ ކައިވެނި ބައްލަވައިގެން އުޅުއްވަނީ އިންޑޮނޭޝިއާގެ ކުރީގެ ޑިކްޓޭޓަރު ސުހާޓޯގެ ދަރިފުޅާއެވެ.
އޭގެ ކުރިން ވެރިކަން ކުރެއްވި ސުކާރްނޯ ޕުތުރިއަކީވެސް ނެޕޯ ބޭބީއެކެވެ. އެކަމަކު، ފުރަތަމަ ރައީސް ސުކާރްނޯގެ ދަރިފުޅު ރައީސްކަމަށް އިންތިޚާބުވެ ވަޑައިގަތީ ސުހާޓޯގެ ވެރިކަން ވައްޓާލި ފަހުންނެވެ.
