(ވެކްސިން ސާދާގަރު އާދާރް ޕޫނޭވާލާއާއި އަންހެނުން ނަތާޝާ)
ވެކްސިން އުފައްދާ ކުންފުނި ސެރަމް އިންސްޓިޓިއުޓް އޮފް އިންޑިއާގެ ސީއީއޯ އަދާރު ޕޫނޭވާލާ ވަނީ، ފިލްމު އުފައްދާ ކަރަން ޖޯހަރުގެ ދަރްމާ ޕްރޮޑަކްޝަންސް ކުންފުނީގެ %50 ހިއްސާ 10 ބިލިއަން ރުފިޔާ (119 މިލިއަން ޑޮލަރަށް) އަށް ގަންނަން ނިންމާފައި ކަމަށް ބޮލީވުޑް ސްޓޫޑިއޯއިން ބުނެފި އެވެ.
ޕޫނޭވާލާ މި ހިއްސާ ގަންނަނީ އޭނާގެ ޕްރޮޑަކްޝަން ކުންފުނި ސެރީން ޕްރޮޑަކްޝަންސް މެދުވެރިކޮށެވެ. މިއީ 2021 ވަނަ އަހަރު ސޯޝަލް މީޑިއާ ޕްލެޓްފޯމް ވަކާއު އިންޓަރެކްޓިވްގެ %20 ހިއްސާ ގަތް ފަހުން ބޭސްއުފެއްދުމުގެ ދާއިރާއިން ބޭރުގައި އޭނާ ކުރި ފުރަތަމަ ބޮޑު އިންވެސްޓްމަންޓެވެ.
ސީރަމް އިންސްޓިޓިއުޓް އޮފް އިންޑިއާ އިން ކޯވިޑް-19 ގެ ދުވަސްވަރު "ކޮވިޝީލްޑް" ބްރޭންޑްގެ ވެކްސިން ވިއްކައިގެން ފައިދާ ހޯދާފައި ވެއެވެ.
އޭގެ ފަހުން ހިމަބިހި، ޑެންގީ އަދި ސާވިކަލް ކެންސަރަށް ދޭ އެހެން ވެކްސިންތަކަށް ވެސް އިންވެސްޓްކޮށްފައިވެ އެވެ.
ކަރަން ޖޯހަރުގެ ކުންފުނީގައި އިންވެސްޓް ކުރުމުގެ މަގުސަދަކީ ޒަމާނީ ޓެކްނޮލޮޖީތަކާއި ކުރިއަރާފައިވާ ޕްރޮޑަކްޝަން ސާމާނު ބޭނުންކޮށްގެން ކޮންޓެންޓް އުފައްދައި، ޑިސްޓްރިބިއުޓުކޮށް، އަދި އޯޑިއަންސް އެންގޭޖްމަންޓް އިތުރު ކުރުން ކަމަށް މި ވިޔަފާރިއާ ގުޅިގެން ޕޫނޭވާލާގެ ފަރާތުން ނެރެފައިޥާ ބަޔާންގައި ވެއެވެ
އިންޑިއާގެ ފިލްމު ޕްރޮޑަކްޝަން ހައުސްތަކުން ބޮލީވުޑްގެ އާ ފިލްމުތަކަށް އިންވެސްޓްކުރި ފައިސާގެ ފައިދާ އަނބުރާ ހޯދުމަށް މިހާރު އުދަގޫ ވެފައި ވެއެވެ.
ސެލެބްރިޓީ ޓޯކް ޝޯ "ކޮފީ ވިތު ކަރަން" އާއި "ކަބީ ޚުޝީ ކަބީ ޣަމް" އާއި "މައި ނޭމް އިޒް ޚާން" ފަދަ ބޮލީވުޑް ފިލްމުތައް އުފެއްދި ކަރަން ޖޯހަރުގެ ދަރްމާ ކުންފުނީގެ އަގު 20 ބިލިއަން އިންޑިއާ ރުޕީސްއަށް އަރައެވެ.
