ރަޝިޔާގެ ކާޒާންގައި ކުރިއަށްދާ ބްރިކްސް ސަމިޓްގެ ހަވާސާގައި، މިއަދު އިންޑިއާގެ ބޮޑުވަޒީރު ނަރެންދުރަ މޯދީ ޗައިނާގެ ރައީސް ޝީ ޖިންޕިންއާ އެކު ބައްދަލު ކުރެއްވުމަށް ހަމަޖެހިފައި ވެއެވެ.
ބްރިކްސް ގެ ޤައުމުތަކުގެ 16 ވަނަ ސަމިޓުގެ ދެވަނަ ދުވަހު ދެ ގައުމުގެ ލީޑަރުން ބައްދަލު ކުރައްވަނީ ލަދާކްގައި ހަތަރު އަހަރު ވަންދެން ހިނގަމުންދިޔަ ހަމަނުޖެހުން ހައްލު ކުރެވުމަށްފަހުއެވެ.
ރަޝިޔާގެ 5 ވަނައަށް އެންމެ ބޮޑު ސިޓީ ކާޒާންގައި ބާއްވާ ސަމިޓްގެ ފުރަތަމަ ދުވަހު ރަޝިޔާގެ ރައީސް ވްލަޑިމިއާ ޕޫޓިން ވަނީ، އިންޑިއާގެ މޯދީ އާ ބައްދަލު ކުރައްވާފައެވެ. އަދި އީރާންގެ ރައީސް މަސްޢޫދު ޕަޒެޝްކިއަންއާވެސް ބައްދަލު ކުރައްވައި ދެޤައުމުގެ ގުޅުމާ ބެހޭ ގޮތުން މަޝްވަރާ ކުރައްވާފައެވެ.
ޕޫޓިން ވަނީ މި ސަމިޓަށް ވަޑައިގަތް އދގެ ސެކްރެޓަރީ ޖެނެރަލް އެންތޯނިއޯ ގުޓަރޭސްއާ ވެސް ބައްދަލު ކުރައްވާފައެވެ. މިއީ ދެ އަހަރު ފަހުން އދގެ ވެރިޔާ ރަޝިޔާއަށް ވަޑައިގަތް ފުރަތަމަ ދަތުރުފުޅެވެ.
ޕޫޓިން ވިދާޅުވެފައި ވަނީ ކާޒާންގެ ސަމިޓަކީ، "މަލްޓިޕޯލާ ވޯލްޑް އޯޑަރ" އެއް އުފެދޭނެ މަހާސިންތާއެއް ކަމަށެވެ.
މީޑިއާ ރިޕޯޓުތައް ބުނާ ގޮތުން ދުނިޔޭގައި ކުރިއަރަމުން އަންނަ އިގްތިސާދުތައް އެއްގަލަކަށް އެރުމުން ޔޫރަޕްގައި މިއަދު ނުތަނަވަސްކަން ފާޅުކޮށްފައި ވެއެވެ.
މި ސަމިޓް އެތައް ގޮތަކަށް މުހިންމު ވެގެންދާއިރު، ނޭޓޯގެ މެމްބަރު ތުރުކީންވެސް ވަނީ ބްރިކްސްގެ ސަމިޓްގައި ބައިވެރިވެފައެވެ.
ބްރިކްސްގެ ރިއާސަތު ބަލަހައްޓަވާ ޕޫޓިން އިޢުލާން ކުރެއްވި ގޮތުގައި ބްރިކްސްއާ ގުޅެން ބޭނުންވާކަން 30 އަށް ވުރެ ގިނަ ގައުމުން ވަނީ ފާޅުކޮށްފައެވެ.
މި ސަމިޓްގައި ބްރިކްސްގައި ބައިވެރިވާ 13 އައު ޤައުމު އިޢުލާން ކުރެވޭނެ ކަމަށް ރަޝިޔާއިން ބުނެއެވެ.
