އިންޑިއާގެ މުސްލިމުން ހިންގާ ދީނީ މަދަރުސާތައް ބަންދުކުރުމަށް ބީޖޭޕީގެ ޔޯގީ އަދިތިޔަނާތުގެ ސަރުކާރުން ކުރި މަސައްކަތް ފަންފުލުން ހިނގައްޖެއެވެ.
ޔޯގީ ސަރުކާރުން އަޑީގައި އޮވެގެން ހުށަހެޅި ދައުވާއެއްގައި އިލާހްއާބާދު ހައިކޯޓުން ވަނީ އިންޑިއާގެ މުސްލިމުންނަށް އެމީހުންގެ އަމިއްލަ ދީނީ މަދަރުސާތައް ނުހިންގޭނެ ކަމަށާއި އެފަދަ މަދަރުސާތައް ހންގުމަކީ އިންޑިއާގެ ދުސްތޫރު ބުނާ ގައުމުގެ ޢިލްމާނީ އުސޫލާ ޚިލާފް ޢަމަލެއް ކަމަށް ނިންމާފައެވެ.
މުސްލިމުން ސުޕްރީން ކޯޓުގައި މި މައްސަލަ އިސްތިއުނާފު ކުރިއެވެ.
3 ފަނޑިޔާރުންނާއެކު އިންޑިއާގެ އުއްތަމަ ފަނޑިޔާރު އިސްވެ އިންނެވި ބެންޗުން ނިންމާފައި ވަނީ، ގާނޫނުއަސާސީގެ މާއްދާ 30ގެ ދަށުން، ބައިމަދު މީހުންނަށް އެމީހުންގެ އަމިއްލަ ތައުލީމީ މުއައްސަސާތައް ހިންގިދާނެ ކަމަށާއި އަދި އެތަންތާނގައި އެމީހުންނަށް އިންޖިނިއަރިންގ ފަދަ ޢިލްމީ ޑިގްރީތައް ދެވިދާނެ ކަމަށެވެ. އަދި އެފަދަ ތަޢުލީމީ މުއައްސަސާއަކީ ދީނީ ނުވަތަ ބައިމަދު މީހުންގެ ދަރިކޮޅުގެ ބަހާ ގުޅޭ މުއައްސަސާއެއް ކަމުގައިވެސް ވެދާނެ ކަމަށެވެ. ނަމަވެސް މާއްދާ 28އަށް ހަވާލާ ދެއްވަމުން ވިދާޅުވެފައި ވަނީ އެމާއްދާގައިވެސް ބުނެފައި ވަނީ އެފަދަ މުއައްސަސާއެއްގެ ދީނީ ޕްރޮގްރާމު ހިންގުމަށް ސަރުކާރުން ފައިސާ ދިނުން މަނާ ކުރާ ވާހަކަ ކަމަށެވެ.
