ބްރިކްސްގެ ގައުމުތަކަށް އާ އިންވެސްޓްމަންޓް ޕްލެޓްފޯމެއް އުފެއްދުމަށް ރަޝިޔާގެ ރައީސް ވްލަޑިމިއާ ޕޫޓިން މިއަދު ހުށަހަޅުއްވާފައިވާ ކަމަށް ރޮއިޓާސް އިން ބުނެފި އެވެ.
"އަޅުގަނޑުމެން ހުށަހަޅަނީ ބްރިކްސްގެ އާ އިންވެސްޓްމަންޓް ޕްލެޓްފޯމެއް ގާއިމް ކުރަން،" ބްރިކްސް ސަމިޓްގެ ޕްލެނަރީ ސެޝަންގައި ވާހަކަފުޅު ދައްކަވަމުން ޕޫޓިން ވިދާޅުވި އެވެ. "އަޅުގަނޑުމެން ގުޅިގެން އިގްތިސާދުގެ ލޯ އެމިޝަން މޮޑެލް ޕްރޮމޯޓް ކުރަން ޖެހޭ. ދުނިޔޭގެ ދެކުނުގެ ބިތުގެ ހުރިހާ ގައުމަކަށް މާލީ ވަސީލަތްތައް ފޯރުކޮށްދިނުމަށް އާ ބްރިކްސް ގްލޯބަލް އިންވެސްޓްމަންޓް ޕްލެޓްފޯމެއް އޮންނަން ޖެހޭ،" ރަޝިޔާގެ ރައީސް ވިދާޅުވި އެވެ.
މިހާރު ވެސް ބްރިކްސްގެ މާލީ ދެ ޕްލެޓްފޯމެއް އޮވެއެވެ. އެއީ، ޝަންހާއީގައި މައި އޮފީސް ހުންނަ ޑިވެލޮޕްމަންޓް ބޭންކާއި ކޮންޓިންޖެންޓް ރިޒާވް އެރޭންޖްމަންޓު ފަންޑެވެ.
ޑިވެލޮޕްމަންޓް ބޭންކުން ބްރިކްސް އާއި ކުރިއަރަމުން އަންނަ އެހެން އިގްތިސާދުތަކާއި ތަރައްގީވަމުން އަންނަ ގައުމުތަކުގައި އިންފްރާސްޓްރަކްޗާ އާއި ދެމެހެއްޓެނިވި ތަރައްގީގެ މަޝްރޫއުތަކަށް ހޭދަ ކޮށްދެނީ، ދުނިޔޭގެ ކުރިއެރުމާއި ތަރައްގީއަށް އެތައް ގައުމަކާއި އިދާރާތައް ބައިވެރިވާ ސަރަހައްދީ މާލީ އިދާރާތަކުން މިހާރު ކުރަމުންދާ މަސައްކަތްތަކަށް އިތުރު ބުރަދަނެއް ދިނުމުގެ ގޮތުންނެވެ.
ކޮންޓިންޖެންސީ ރިޒާވް އެރޭންޖްމަންޓަކީ އިގްތިސާދަށް ހީނަރުކަމެއް ވެރިވާ ހިނދު މާލީ ހަމަޖެހުން އިތުރަށް ހަރުދަނާ ކޮށް ބެލެންސް އޮފް ޕޭމަންޓް ކްރައިސިސްގެ ހާލަތު ކުޑަކުރުމަށް އެހީތެރިވުމަށްޓަކައި ކަރަންސީ ސްވޮޕް މެދުވެރިކޮށް ބްރިކްސްގެ މެމްބަރުންނަށް ކުރު މުއްދަތުގެ މާލީ އެހީ ދޭ އެރޭންޖުމެންޓެވެ.
