ފޮޓޯއަށް ބަލާލާ މީހަކު އާސޯޚުވެގެން، އަސްތާ އޭ ބުނެ، ޕީއެޗްޑީއެއް ދޯ އޭ ބުނެލާނެއެވެ! ހަގީގަތަކީ އެހެނެއް ނޫނެވެ. މީހާއަކީ ހުރިގޮތަކަށް ހުރި ފޭކް މީހެކެވެ. ނަމަކީ މޮރިސް ސަމުއެލް ކްރިސްޓިއަން އެވެ. ވަޒަނަކީ އިންޑިއާގެ ގުޖުރާތު ސްޓޭޓްގެ ގާނދީނަގަރުއެވެ.
މޮޅު އައިޑިއާއެއް އައިސްގެން އެއް ދުވަހަކު މި ކްރިސްޓިއަން އިމާރާތަކުން އޮފީހެއް ކުއްޔަށް ހިފިއެވެ. ނަން ބޯޑުގައި ޖެހީ އެއީ ޝަރުއީ ކޯޓެއް ކަމަށެވެ!
ކޯޓުގެ ވަކީލުންނާއި މުވައްޒަފުންގެ ގޮތުގައި އޭނާގެ އައުވާނުން ކޮޅެއް ގެންގުޅެން ފެށީއެވެ. އެމީހުންނަށް ތަމްރީނު ދިން ކަމެއް ކަށަވަރެއް ނޫނެވެ. އެކަމަކު އެމީހުން އެމީހުންގެ ވަޒީފާގެ ދައުރު އަދާކޮށްފައިވާ ގޮތް ނިކަން ފުރިހަމަ ކަން މުޅި ޖަރީމާއިން ސާފު ވެއެވެ.
ކްރިސްޓިއަން މީހުންނަށް އޮޅުވާލައިގެން 5 އަހަރު ވަންދެން ގާޒީއެއްގެ ގޮތުގައި އަމިއްލައަށް ހެދި ކޯޓުގައި ޝަރިއަތް ކޮށްދިނެވެ. އޭނާ ޝަރިއަތް ކޮށްދެނީ ފައިސާއަށެވެ. ދެ ފަރާތުންވެސް ފީއެއް ނަގައެވެ.
ޚުޞޫމަތް ހައްލުކޮށްދެއެވެ. ގިނަ މައްސަލަތަކަކީ ބިމުގެ މައްސަލަތަކެވެ.
ބޮނޑިއެއް ބުއީވެސް ކްރިސްޓިއަން އަމިއްލައަށެވެ!
ސަރުކާރާ ދެކޮޅަށް އަމިއްލައަށް ނިންމި މައްސަލައެއް، އަތްގާތް ކޮށްދޭން ގެންގުޅޭ ސޮރަކު ލައްވައި އިސްތިއުނާފް ކުރުވުމުން، މަތީ ކޯޓުގެ ރެޖިސްޓްރާއަށް ކޯޓުގެ އެޑްރެހާ މެދު ސުއާލު އުފެދިގެން އިތުރަށް ހޯދުމުން ކްރިސްޓިއަން ބަސްޓުވީއެވެ.
ފުލުހުން ވަނީ އޭނާއާއި އައުވާނުން ހައްޔަރުކޮށްފައެވެ.
ކްރިސްޓިއަން ބުނަނީ އަބަދުވެސް ބެދޭނީ ރަނގަޅަށް ކަން ކޮށްދޭން މީހާ ކަމަށެވެ. އޭނާ ބުނަނީ ތިމަންގެ ކުށަކަކީ މީހުންގެ ދެބަސްވުންތައް ހައްލުކޮށްދޭން މަސައްކަތް ކޮށްދިނުމެވެ! ގަބޫލު ކުރެވޭ ހެއްޔެވެ؟
