އީރާނުން ބޮޑެތި ގެއްލުން ދެނިވި ހަތިޔާރު އުފައްދުމަށް އެހީވެދޭ ކަމަށާއި ޗައިނާގެ ސިފައިން ޒަމާނީ ކުރުމުގެ މަސައްކަތަށް ތާއީދުކުރާ ކަމަށް ބުނެ އެމެރިކާއިން ވަނީ 6 ކުންފުންޏަކާ ދެކޮޅަށް ފިޔަވަޅު އަޅައި އެކްސްޕޯޓު ބްލެކްލިސްޓަށް އެ 6 ކުންފުނި އިތުރު ކޮށްފައެވެ.
އެމެރިކާގެ އެކްސްޕޯޓް އެޑްމިނިސްޓްރޭޝަންގެ އެސިސްޓެންޓް ސެކްރެޓަރީ އޮފް ކޮމާސް ތިއާ ޑީ ރޮޒްމަން ކެންޑްލަރ ވިދާޅުވީ އެމެރިކާއިން އަޅާފައިވާ ކޮންޓްރޯލްތަކުން ސަލާމަތްވެގެން، އެމެރިކާގެ ގައުމީ ސަލާމަތަށް ނުރައްކާވާ ގޮތަށް އަމަލު ކުރާ ފަރާތްތަކަށް ފިޔަވަޅު އަޅާނެ ކަމަށެވެ.
މެދު އިރުމަތީގެ އެންމެ ބޮޑު ބާރު އީރާނުން ދަނީ ނިއުކްލިއަރ ހަތިޔާރާއި ޑްރޯން އުފެއްދުމުގައި އަމިއްލަ ފައިމައްޗަށް ތެދުވަމުންނެވެ. އެމެރިކާއިން ބުނަނީ އީރާނުގެ ޑްރޯން ޕްރޮގްރާމާއި ޕާކިސްތާނުގެ ބެލިސްޓިކް މިސައިލް ޕްރޮގްރާމް ފަދަ ޕްރޮގްރާމްތަކަކީ އެމެރިކާގެ ގައުމީ ސަލާމަތަށް ބޮޑެތި ނުރައްކާތަކެއް ކުރިމަތިވާ ޕްރޮގްރާމްތަކެއް ކަމަށެވެ. އަދި އެ ޕްރޮގްރާމުތަކަށް އެމެރިކާގެ ޓެކްނޮލޮޖީ ލިބިދިނުމަށް ބޭނުން ނުވާ ކަމަށެވެ. މިފަދަ ފިޔަވަޅުތަކުން މި ޤައުމުތަކަށް އިތުރަށް ތަރައްގީވެ ކުރިއަށް ދިއުމަކަށް މި ފިޔަވަޅުތައް ބާރަކަށް ވެއެވެ.
