އިންޑިއާއަކީ "ޒިންމާދާރު ޑިމޮކްރަސީ" އެއް ކަމަށާއި އެއްވެސް ގައުމަކަށް ގެއްލުން ދިނުމުގެ ސިޔާސަތެއް ނުގެން ގުޅޭ ކަމަށާއި އެހެން ގައުމުތަކުގެ ދާޚިލީ ކަންކަމުގެ ތެރެއަށް އިންޑިއާ ނުވަންނާނެ ކަމަށް ކެނެޑާގައި ހުންނެވި އިންޑިއާގެ ހައިކޮމިޝަނަރު ސަންޖޭ ކުމާރު ވަރްމާ ވިދާޅުވެއެވެ. އޭއެންއައިއަށް ދެއްވި އިންޓަރވިއުގައި އޭނާ ވިދާޅުވީ ކެނެޑާ ބޮޑު ވަޒީރުގެ އަމަލުތަކުން، އިންޑިއާގެ ޑިޕްލޮމެޓުންގެ "ސަލާމަތަށް ނުރައްކާވި" ކަމަށެވެ. އަދި ޓްރޫޑޯ އިންޑިއާއާ މެދު ނުބައި ވިސްނުމެއް ގެންގުޅޭ ކަމަށްވެސް އޭނާ ވިދާޅުވިއެވެ.
ކެނެޑާގައި ތިބޭ ޚާލިސްތާނީ ހަރުކަށި ފިކުރުގެ މީހުންނަކީ އެގައުމުގައި ސިޔާސީ ނުފޫޒު ބޮޑު ބައެއް ކަމަށް ވަރްމާ ފާހަގަކުރެއްވި އެވެ. އަދި އޭނާ ވިދާޅުވީ ކެނެޑާއިން ކުރާ ތުހުމަތަށް އެއްވެސް ހެއްކެއް ދައްކާފައި ނުވާ ކަމަށެވެ.
"ގައުމެއްގެ ދާޚިލީ ކަންކަމުގެ ތެރެއަށް ވަނުމުގެ ސިޔާސަތެއް ނެތް،" އޭއެންއައިއާ ވާހަކަ ދައްކަވަމުން އިންޑިއާގެ ސިޔާސަތާ ބެހޭ ގޮތުން އޭނާ ވިދާޅުވި އެވެ.
