އެމެރިކާއިން ހަތިޔާރު ދީގެން ޒަޔަނިސްޓް ނެޕީ ފޯސް ލައްވައި ކުރުވަމުން ގެންދާ ހަނގުރާމައިގައި ނެޕީ ފޯސްއިން ޖަބާލިޔާގައި ގަތުލުއާންމެއް ހިންގައިފިއެވެ. މިހާތަނަށް މި ގަތުލުއާންމުގައި 150 މީހުން ޝަހީދުކޮށްފައިވާ ކަމަށް ރިޕޯޓުކޮށްފައި ވެއެވެ. ޝަހީދުންގެ އަދަދުތައް ގުނައި ނިމުމުން އިތުރުވާނެ ކަމަށްވެސް ލަފާ ކުރެވެއެވެ.
ހިތްވަރެއް ލައިގެން މި ގަތުލުއާންމު ކުށްވެރިކޮށްފައި ވަނީ ޖޯޑަން އިންނެވެ. މިހާތަނަށްވެސް އަރަބި އަޚުން އެންމެ ދީލަތިކޮށް ކޮށްފައިވާ ކަމަކީ ކުށްވެރިކުރުމާއި ސައްލާ ކުރުމެވެ!
ޣައްޒާގެ ސިވިލް ޑިފެންސް އެޖެންސީން ބުނެފައިވަނީ، ޣައްޒާގެ އުތުރުގެ ޖަބަލިއާ ރެފިއުޖީ ކޭމްޕްގައި ރޭ ހިނގާފައިވާ ގަތުލުއާންމަކީ، އާއިލާއެއް ދިރިއުޅޭ އިމާރާތަކަށް ބޮން އަޅައިގެން ހިންގާފައިވާ ގަތުލުއާންމެއް ކަމަށެވެ.
ވަފާ ނޫސް އެޖެންސީން ލޯކަލް މަސްދަރުތަކާ ހަވާލާދީ ރިޕޯޓްކުރާ ގޮތުގައި މި ހަމަލާގައި އަންހެނުންނާއި ކުޑަކުދިން ހިމެނޭ ގޮތަށް 150 އެއްހާ މީހުން ޝަހީދުކޮށްފައި ވެއެވެ. ނެޕީ ފޯސްގެ ހަމަލަތަކާ ހެދި، އެހިސާބަށް އެމްބިއުލާންސް އާއި ރެސްކިއު ކްރޫންނަށް ދިއުމަށް ދަތިތަކެއް ކުރިމަތިވާ ކަމަށްވެސް ރިޕޯޓް ކޮށްފައި ވެއެވެ.
