އިންޑޮނޭޝިއާއިން ވަނީ ޗައިނާގެ ޓެމޫ ނަމަކަށް ކިޔާ އީކޮމާސް އެޕެއް ބްލޮކް ކޮށްފައެވެ. މިއެޕަކީ، އާދަޔާ ޚިލާފަށް އަގުހެޔޮކޮށް އޮންލައިކޮށް ތަކެތި ވިއްކައިދޭ އެޕެކެވެ. ޓެމޫއިން އިންޑޮނޭޝިއާއަށް ޝިޕްކޮށްދެނީ ސީދާ ޗައިނާގެ ޕްރޮޑިއުސަރުންގެ އަތުން ނެވެ.
މިއެޕް މަނާކުރުމާއި އިންޑިނޭޝިއާއިން ހިންގާ ކުޑަ ހަނގުރާމައާ ބެހޭ ގޮތުން ޑިޕްލޮމެޓުން ރިޕޯޓު ކުރަމުން ބުނަނީ، ޗައިނާގެ އިގްތިސާދު އޮތީ ދައުރުވުމުގެ ދަތިކަމެއްގެ ތެރޭގައި ކަމަށެވެ. އެހެންވެ، ޗައިނާގެ ސާޕްލަސް މުދާ ދުރަށް އެކްސްޕޯޓްކޮށްގެން މާކެޓް ރީބެލެންސް ކުރަން ބެއިޖިންގ އިން އަމާޒު ހިފާފައިވާ ކަމަށެވެ.
ޓެމޫ އެޕް އިން ކުއްލިއަކަށް ބޮޑު ޑިސްކައުންޓެއް ލިބޭ މުދާ އިންޑޮނޭޝިއާގެ މާކެޓްތަކަށް ކޮއްޕާލާ ސަބަބު އެކަމުން ހާމަވެގެންދާ ކަމަށެވެ.
ޓެމޫގެ އަގުހެޔޮ އޮފާތަކަށް އިންޑޮނޭޝިއާ ސަރުކާރު އޮތީ ވަރަށް ހައްސާސްކޮށް ކަމަށް ޑިޕްލޮމެޓުން ބުނެއެވެ. އަދި އިންޑޮނޭޝިއާގައި ޓެމޫ ލައިސަންސް ނަގައިގެން ހިންގުމަށް ހުއްދަ ނުދޭންވެސް ސަރުކާރުން ވަނީ ސާބިތުކަމާއެކު ދެކޮޅު ހަދާފައެވެ. އަދި އިންޑޮނޭޝިއާގައި ޕްލޭސްޓޯރުން ޓެމޫ ނުފެންނަ ގޮތް ހަދައި ޕޮޕް އެޑްތަކުގައިވެސް ޓެމޫ ނުފެންނަ ގޮތް ހަދާފައި ވެއެވެ.
އިންޑޮނޭޝިއާގެ މައިގަނޑު ކަންބޮޑުވުމަކީ ޗައިނާގެ އަގުހެޔޮ މުދާ ބާޒާރަށް އަޅާލުމުގެ ސަބަބުން އިންޑޮނޭޝިއާގެ މީހުންގެ އުފެއްދުންތައް ބަނގުރޫޓުވެގެން ދިއުމުގެ ބިރެވެ. އަދި ޓެމޫއާ އެއްވަރަށް އިންޑޮނޭޝިއާގެ ރީޓެއިލް ވިޔަފާރިވެރިންނާއި އުފެއްދުންތެރިންނަށް ވާދަ ނުކުރެވި، ޕްރެޝަރަށް އަރަން ޖެހިދާނެތީއެވެ.
އިންޑޮނޭޝިއާއަކީ އާބާދީ ބޮޑު، ބިޔަ މާކެޓެކެވެ. ޗައިނާއިން އިންޑޮނޭޝިއާގެ މާކެޓަށް ވަނުމަށް ތަފާތު ގޮތްގޮތުން މަސައްކަތް ކުރެއެވެ. އޭގެ އެއް މައްސަލައަކީ ޓިކްޓޮކެވެ. ޓިކްޓޮކުން ފައިދާ ނަގަން އުޅުމުން އިންޑޮނޭޝިއާއިން އެކަން ހުއްޓުވިއެވެ. ފަހުން ޓިކްޓޮކްގެ މައި ކުންފުނި ބައިޓްޑާންސްއިން ގަނެލީ އިންޑޮނޭޝިއާގެ ބޮޑު އީ ކޮމާސް ވިޔަފާރިއެކެވެ.
ބައިޓްޑާންސް އިން ވަނީ އިންޑޮނޭޝިއާގެ އީ-ކޮމާސް ޕްލެޓްފޯމް ޓޮކޯޕީޑިއާގެ ކޮންޓްރޯލިން ހިއްސާއެއް ގަނެފަ އެވެ.
