މޯލްޑިވްސް އިމިގްރޭޝަނުން ހިންގި އޮޕަރޭޝަނެއްގައި ކ. ގުރައިދޫން 39 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ. މިއީ ގަވާއިދާ ޚިލާފަށް ރާއްޖޭގައި އުޅޭ ބިދޭސީން ހޯދުމަށް އިމިގްރޭޝަނުން ރަށްރަށުގައި ފަށާފައިވާ އޮޕަރޭޝަންތަކުގެ ތެރެއިން ފުރަތަމަ އޮޕަރޭޝަނެވެ.
މިދިޔަ ބުރާސްފަތި ދުވަހު ހިންގުނު މި އޮޕަރޭޝަންގައި އިމިގްރޭޝަންގެ 20 އޮފިސަރުންނާއި، ފުލުހުންގެ 9 އޮފިސަރުންގެ އިތުރުން ގުރައިދޫ ކައުންސިލުން ވެސް ބައިވެރިވިއެވެ. އިމިގްރޭޝަންގެ ކޮންޓްރޯލަރ ޖެނެރަލް މުޙައްމަދު ޝަމްއާން ވަޙީދާއި ޑެޕިއުޓީ ކޮންޓްރޯލަރ އަޙްމަދު އަޝްފާން ވެސް މި އޮޕަރޭޝަންގައި އަމަލީގޮތުން ބައިވެރިވެ ވަޑައިގަތެވެ.
އިމިގްރޭޝަނުން މަޢުލޫމާތު ދެއްވިގޮތުގައި މި އޮޕަރޭޝަންގައި 42 ތަނެއް ބަލައި ފާސްކޮށް، 106 ބިދޭސީއަކު ޗެކްކުރެވުނެވެ. މީގެ ތެރެއިން ވިސާ ފުރިހަމަ ނޫން 11 ބިދޭސީންނަށް އިމިގްރޭޝަނަށް ހާޒިރުވުމަށް ލިޔުން ދެވުނެވެ. އަދި ގަވާއިދާ ޚިލާފަށް ބިދޭސީންނަށް ވަޒީފާ ދީގެން އުޅުނު 5 ދިވެއްސަކަށް ލިޔުމުން ނަސޭހަތް ދެވުނެވެ.
އިމިގްރޭޝަންގެ ބެލުމުގެ ދަށަށް ގެންދެވުނު 39 ބިދޭސީންގެ ތެރޭގައި ބަންގްލަދޭޝް، ސްރީލަންކާ، ނޭޕާލް، އިންޑިއާ އަދި ނައިޖީރިއާގެ ރައްޔިތުން ހިމެނެއެވެ.
ކޮންޓްރޯލަރ ޖެނެރަލް ވިދާޅުވިގޮތުގައި މިއީ މާލެ ސަރަހައްދުގައި ގަވާއިދާ ޚިލާފަށް އުޅޭ ބިދޭސީން ބަލައި ފާސްކުރުމަށް އޮޕަރޭޝަންތައް ފެށުމާ ގުޅިގެން އަތޮޅުތަކަށް ދިޔަ ބިދޭސީންނާ ބެހޭގޮތުން އާންމުންގެ ފަރާތުން ލިބެމުންދާ ޝަކުވާތަކާ ގުޅިގެން އަތޮޅުތަކަށް މި އޮޕަރޭޝަން ފުޅާކުރުމުގެ މަސައްކަތުގެ ފެށުމެކެވެ.
އިމިގްރޭޝަނުން ހިންގަމުންދާ މިފަދަ އޮޕަރޭޝަންތަކުގެ ސަބަބުން މާލެ ސަރަހައްދުން ގިނަ އަދަދެއްގެ ބިދޭސީން ވަނީ ހިފެހެއްޓާ ޑިޕޯޓްކުރެވިފައެވެ. މި އޮޕަރޭޝަންތަކުގެ މަޤްޞަދަކީ ދީފައިވާ ހުއްދައިގެ ބޭރުން ރާއްޖޭގައި އުޅެމުންދާ ބިދޭސީންނާއި ގަވާއިދާ ޚިލާފަށް ކުދި އަދި މެދު ފަންތީގެތީގެ ވިޔަފާރި ކުރަމުންދާ ބިދޭސީން ދެނެގަނެ، އިމިގްރޭޝަން ޤާނޫނުގެ ދަށުން ފިޔަވަޅު އެޅުންކަމަށް އިމިގްރޭޝަންއިން ވިދާޅުވިއެވެ.
