ބ. އޭދަފުށީގެ ބަނދަރު ތަރައްޤީ ކުރުމުގެ މަޝްރޫޢުގެ ދަށުން ކުރިއަށްދާ ނެރު ފުންކުރުމުގެ މަސައްކަތުގެ 93 އިންސައްތަ ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.
އެމްޓީސީސީން މަޢުލޫމާތު ދެއްވާފައިވާ ގޮތުގައި، މިހާރު ހުރި ބަނދަރު ފުންކުރުމުގެ މަސައްކަތުގެ 87 އިންސައްތަ ވެސް ވަނީ ނިމިފައެވެ. މީގެ އިތުރުން، އެއްގަމުތޮށި ލުމަށް ބޭނުންވާ ކޮންކްރީޓް ގަލުގެ ދެވަނަ ޝިޕްމަންޓް ސައިޓަށް ގެންދެވި، މިހާރު ކުރިއަށްދަނީ ގައު އެތުރުމުގެ މަސައްކަތްކަމަށް އެމްޓީސީސީއިން ވިދާޅުވިއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރުން އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫޢުގެ އަގަކީ 64.67 މިލިއަން ރުފިޔާއެވެ. މި މަޝްރޫޢުގެ ދަށުން 28,304 ކިއުބިކް މީޓަރުގެ ސަރަހައްދެއްގައި މެއިންޓެނަންސް ޑްރެޖިންގ އަދި 3,354 ކިއުބިކް މީޓަރުގެ ސަރަހައްދެއްގައި ޗެނަލް ޑްރެޖިންގ ހިމެނެއެވެ.
މީގެ އިތުރުން، 402 މީޓަރުގެ ކުއޭ ވޯލްއެއް، 170 މީޓަރުގެ ބްރޭކްވޯޓަރެއް، 383 މީޓަރުގެ ރިވެޓްމަންޓެއް، އަދި 18 މީޓަރު ދިގު އަދި 2 މީޓަރު ފުޅާ ބްރިޖެއް އަދި ރެމްޕެއް ހެދުން ހިމެނެއެވެ. އަދި 1,814 އަކަ މީޓަރުގެ ޕޭވްމަންޓެއް އެޅުމުގެ މަސައްކަތްވެސް މި މަޝްރޫޢުގެ ދަށުން އެމްޓީސީސީން ކުރިއަށް ގެންދާނެއެވެ.
