އިޓާލިއަން ސެރިއާގައި ރޭގައި އޭސީ މިލާން އަތުން 2-0 އިން މޮޅުވެ, ލީގުގެ އެއްވަނައިގައި ނަޕޯލީއިން ބޮޑު ލީޑެއް ނަގައިފިއެވެ.
އޭސީ މިލާނުގެ ސޭން ސީރޯ ސްޓޭޑިއަމްގައި ކުޅުނު މެޗު ނަޕޯލީއިން ފަށާފައިވަނީ ވަރުގަދަ ކޮށެވެ. އެ ގޮތުން މެޗުގެ ފެށިގެން އެންމެ ފަސް މިނެޓު ތެރޭގައި އެ ޓީމުން ވަނީ ލަނޑު ޖަހާ މެޗުގެ ލީޑު ނަގާފައެވެ. މި ލަނޑު އެ ޓީމަށް ކާމިޔާބު ކޮށްދިނީ މި އަހަރު އެ ޓީމަށް ސޮއި ކުރި, ރޮމެލޫ ލުކާކޫއެވެ.
މެޗުގެ ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް ނަޕޯލީގެ ހުނަރުވެރި ފޯވާޑް ކަވިއްޗާ ކަވަރަސްކޭލާ ވަނީ ލަނޑެއް ކާމިޔާބު ކޮށް އެ ޓީމުގެ ލީޑު ދެ ގޯލަށް އިތުރު ކޮށްފައެވެ. ކަވަރެސްކޭލާގެ މި ލަނޑާއެކު ފުރަތަމަ ހާފު ނިމިގެންދިޔައީ 2-0 އިން ނަޕޯލީ ކުރީގައި އޮވެގެންނެވެ.
ދެވަނަ ހާފުގައި މިލާނުން ވަނީ އެ ޓީމުގެ ކުޅުން ރަނގަޅުކޮށް މެޗުގެ ނަތީޖާ ހަމަހަމަ ކުރަން މަސައްކަތް ކޮށްފައެވެ. އެ ގޮތުން ދެވަނަ ހާފުގެ 47 ވަނަ މިނެޓުގައި މިލާނުގެ އަލްވާރޯ މޮރާޓާ ވަނީ ލަނޑެއް ކާމިޔާބު ކޮށްފައެވެ. ނަމަވެސް ވީއޭއާރު ބެލުމަށްފަހު, ލަނޑު ޖެހިއިރު މޮރާޓާ ހުރީ އޮފްސައިޑުގައި ކަމަށް ވާތީ ރެފްރީ ވަނީ ގޯލު ސައްހަ ނޫން ކަމަށް ނިންމާފައެވެ.
ދެވަނަ ހާފުގައި މިލާނަށް ވަނީ ލަނޑެއް ޖެހުމަށް އެތައް ރަނގަޅު ފުރުސަތެއް ލިބި ބޭކާރު ވެގެން ގޮސްފައެވެ. ލިބުނު ފުރުސަތުތަކުގެ ބޭނުން ނުހިފުމުން މިލާނަށް ޖެހުނީ އަމިއްލަ ރަށުގައި ނަޕޯލީ އަތުން ބަލި ގަބޫލު ކުރާށެވެ.
މިލާނު އަތުން ލިބުނު މޮޅާއެކު ނަޕޯލީ ވަނީ ލީގުގެ އެއްވަނައިގައި ބޮޑު ލީޑެއް ނަގާފައެވެ. އެ ޓީމު ތާވަލުގެ އެއްވަނައިގައި އޮތީ ކުޅުނު 10 މެޗުން ލިބުނު 25 ޕޮއިންޓާއެކުގައެވެ. މެޗުން ބަލިވި އޭސީ މިލާން އޮތީ, ކުޅުނު 9 މެޗުން ލިބުނު 14 ޕޮއިންޓާއެކު ތާވަލުގެ އަށްވަނައިގައެވެ.
