ތުރުކީވިލާތުގައި ހިންގާ މާސްޓަރސް ޕްރޮގްރާމެއްގައި ބައިވެރިވުމަށް ދިވެހި ފުލުހުންގެ ހިދުމަތުގެ ސާޖަންޓް އަބްދުއްސަމީއު އަބްދުލްހަމީދު ފުރައިފިއެވެ.
ސާޖަންޓް އަބްދުއްސަމީއު ބައިވެރިވަނީ ތުރުކީގެ ޖޯންޑާމަރީ އެންޑް ކޯސްޓްގާޑް އެކަޑަމީގެ ސެކިއުރިޓީ އިންސްޓިޓިއުޓުން ހިންގާ، ތީސިސްއާއެކު ކުރިއަށްގެންދާ މާސްޓަރސް ޕްރޮގްރާމެއްގައެވެ.
މި ޕްރޮގްރާމް ފެށޭނީ އަންނަ ނޮވެމްބަރު 1 ގައެވެ.
ފުލުހުން ބުނީ މި ޕްރޮގްރާމުގެ ދަށުން، ފުރަތަމަ އަހަރު ސާޖަންޓް އަބްދުއްސަމީއު ހޭދަކުރާނީ ތުރުކީ ބަސް ދަސްކުރުމަށާއި އޭގެ ފަހުން، 2025 ގެ އޮކްޓޫބަރު މަހުން ފެށިގެން މާސްޓަރސް ޕްރޮގްރާމްގެ ކިޔެވުން ފަށާނެ ކަމަށެވެ.
މި ޕްރޮގްރާމްގައި ކްރިމިނަލް އިންވެސްޓިގޭޝަން، ސެކިއުރިޓީ މެނޭޖްމަންޓް، ޕަބްލިކް އެޑްމިނިސްޓްރޭޝަން، ޑިޒާސްޓަރ މެނޭޖްމަންޓް، މެރިޓައިމް ސޭފްޓީ އެންޑް ސެކިއުރިޓީ އަދި އިންޓަރނޭޝަނަލް ސެކިއުރިޓީ އެންޑް ޓެރަރިޒަމް ފަދަ ދާއިރާތަކުން ކިޔަވައިދޭނެ ކަމަށްވެސް ފުލުހުން ބުންޏެވެ.
ސާޖަންޓް އަބްދުއްސަމީއަކީ ފުލުހުންގެ އިނީޝަލް ޓްރެއިނިންގ ކޯހުގެ 29 ވަނަ ބެޗްގެ ކޮމިޝަނަރސް އެވޯޑް ލިބިފައިވާ ފުލުހެވެ.
