ސްޕެއިންގެ އިރުމަތީ ދެކުނުގެ ސަރަހައްދުތަކަށް އެރި ވަރުގަދަ ތޫފާނެއްގެ ސަބަބުން ސްޕެނިޝް ލަލީގާގެ ފަސް މެޗެއް ފަސްކުރުމަށް ލަލީގާއިން ސްޕެއިންގެ ފުޓުބޯޅަ ފެޑެރޭޝަން (އާރްއެފްއީއެފް) ކައިރިން އެދިއްޖެއެވެ.
ސްޕެއިންގެ ބޮޑު ސަރަހައްދަކަށް ވަރުގަދަ ތޫފާނެއް އަރާފައިވާއިރު, މި ހާދިސާގައި މިހާރު ވެސް 70 މީހުން މަރުވެފައިވާ ކަމަށް ސްޕެއިންގެ މީޑިއާއިން ހާމަކުރެއެވެ. މި ފަދަ ހިތާމަވެރި ވަގުތެއްގައި މި ކަމުން އަސަރު ކުރި ސަރަހައްދުތަކުގައި ފުޓުބޯޅަ މެޗެއް ކުޅުމަކީ އެންމެ އެދެވިގެންވާ ކަމެއް ކަމުގައި ނުވާތީ ފަސް މެޗެއް ފަސްކޮށްދިނުމަށް ލަލީގާއިިން މި ވަނީ އާރްއެފްއީއެފްގެ ކިބައިން އެދިފައެވެ.
"ސްޕެއިންގެ ބައެއް ސަރަހައްދުތަކަށް އަރާފައުވާ ވަރުގަދަ ތޫފާނުގެ ސަބަބުން އެތައް ނުރައްކަލަކާ ކުރިމަތިލާން ޖެހިފައިވާތީ, ބައެއް ކްލަބުތަކުގެ އެދުމަށް, އާރްއެފްއީއެފްގެ ފަރާތުން ޖުމްލަ ފަސް މެޗެއް ފަސްކޮށްދިނުމަށް ލަލީގާއިން އެދެފިން" މި މައްސަލައާ ގުޅިގެން ލަލީގާއިން ނެރުނު ބަޔަނުގައި ބުންޏެވެ.
ލަލީގާއިން ފަސްކުރުމަށް އެދި ހުށައަޅާފައިވާ ފަސް މެޗަކީ, ރެއާލް މެޑްރިޑް އަދި ވެލެންސިއާ, ވިޔަރިއާލް އަދި ރާޔޯ ވެލެކާނޯ, ކަސްޓެޔޯން އަދި ފެރޮލް, އެލްޑެންސް އަދި ހުއެސްކާ, ލެވަންޓޭ އަދި މަލާގާ ބައްދަލުކުރާ މެޗުތަކެވެ.
