ބްރެޒިލްގެ ތަޖުރިބާކާރު ޑިފެންޑަރު މާސެލޯގެ ކޮންޓްރެކްޓް, އޭނާ ކުޅެމުން އައި ކްލަބު ކަމުގައިވާ ފްލުމިނީސްއިން އުވާލައިފިއެވެ.
ފްލުމިނީސްއިން މާސެލޯއާއެކު ހަދާފައިވާ ކޮންޓްރެކްޓް އުވާލީ, މެޗެއްގެ މެދު ތެރޭގައި މާސެލޯ އާއި އެ ކްލަބުގެ ކޯޗު މާނޯ މެންޑޭޒްއާ ދެމެދު ޖެހުނު މައްސަލައަކާ ގުޅިގެންނެވެ.
މާސެލޯ އާއި މެންޑޭޒްއާ ދެމެދު މައްސަލަ ޖެހެން މެދުވެރިވީ, މެޗުގެ މެދުތެރެއިން މާސެލޯ ކުޅުމުގެ ތެރެއަށް ވަނުމަށް ދަނޑުގެ އަރިމަތީގައި ހުއްޓާ, އިތުރު އިރުޝާދު ދިނުމަށް މެންޑޭޒް އޭނާގެ ގައިގަ އަތް ލުމުންނެވެ.
މެންޑޭޒްގެ އަމަލުތައް ހުރީ މަޑުމައިތިރި މިޒާޖެއްގައި ކަމުގައިވިއަސް މާސެލޯ ވަނީ އޭނާގެ އަތް ފޮޅުވާލައިފައެވެ. މާސެލޯގެ މި ބޭއަދަބީ އަމަލުގެ ސަބަބުން މެންޑޭޒް ވަނީ އޭނާ ކުޅުމުގެ ތެރެއަށް ވައްދަން ދެކޮޅު ހަދާ, އަނެއްކާ ވެސް ބެންޗަށް ފޮނުވާލައިފައެވެ.
މި ހާދިސާ ހިނގިތާ 24 ގަޑިއިރު ނުވަނީސް ފްލުމިނީސްއިން ވަނީ މާސެލޯއާއެކު ހަދާފައިވާ ކޮންޓްރެކްޓް އެ ކްލަބުން އުވާލިކަށް ހާމަކޮށްފައެވެ.
ފްލުމިނީސްއިން އޭނާގެ ކޮންޓްރެކްޓް އުވާލުމާއެކު 36 އަހަރުގެ މާސެލޯ މި ވަގުތު ހުރީ ފްރީ އޭޖެންޓެއްގެ ގޮތުގައެވެ. މާސެލޯގެ ކެރިއަރުގެ ކުރިމަގު އޮތް މިސްރާބެއް އޭނާ އަދި ހާމަކޮށްފައެއް ނުވެއެވެ.
