ސްޕެއިންގެ އިރުމަތީ ދެކުނަށް ވަރުގަދަ ތޫފާނެއް އަރާ, އެތައް ބައެއްގެ ފުރާނަ ގެއްލުނު އިރު ވެސް ލަލީގާއިން ފުޓުބޯޅަ މެޗުތައް ބޭއްވުމުން, އެތުލެޓިކޯ މެޑްރިޑުގެ ކޯޗު ޑިއޭގޯ ސިމިއޯނޭ އެ ލީގަށް ފާޑު ކިޔައިފިއެވެ.
އެތައް ގެއްލުމެއް ސްޕެއިންގެ ރައްޔިތުންނަށް މި ތޫފާނުގެ ސަބަބުން ކޮށްފައިވާއިރު ވެސް ލަލީގާއިން ވަނީ އެ ލީގުގެ ބައެއް މެޗުތައް ކުރިއަށް ގެންގޮސްފައެވެ. މި ފަދަ ދަނޑިވަޅެއްގައި ލަލީގާއިން މެޗުތައް ބޭއްވުމުން ސިމިއޯނޭ ވަނީ އެ ކަމާ މެދު ނުރުހުން ފާޅުކޮށްފައެވެ.
"އަހަންނަކަށް ނުވިސްނޭ ކީއްވެ ކަމެއް ހުރިހާ މެޗުތަކެއް ފަސްނުކުރީ. އެ ތޫފާނުގެ ސަބަބުން އެތައް ބަޔެއްގެ ހަޔާތްތައް ބަރުބާދުވެގެން ގޮސްފި. މި ފަދަ ވަގުތެއްގައި ވެސް އަހަރެމެން ފުޓުބޯޅަ މެޗުތައް ކުޅެން ޖެހޭތީ ހިތާމަ ކުރަން" ލަލީގާގެ ނިންމުމަށް ފާޑުކިޔަމުން ސިމިއޯނޭ ބުންޏެވެ.
ސްޕެއިންއަށް ފަހު ޒަމާނެއްގައި އެރި އެންމެ ނުރައްކާތެރި ތޫފާންކަމަށް މޫސުމީ މާހިރުން ލަފާ ކުރާ މި ތޫފާނުގައި 211 މީހުން މިހާތަނަށް މަރުވެފައިވާއިރު, އެތައް ބަޔަކު ވަނީ ވީ ތަނެއް ނޭންގި ގެއްލިފައެވެ. މި ތޫފާނުގައި ލަލީގާގައި ކުޅެމުން އަންނަ ބައެއް ކުޅުންތެރިންނާއި ކޯޗުންގެ އާއިލާތަކަށް ވަނީ އަސަރުކޮށްފައެވެ.
ތަފާސްހިސާބުތަކުން ދައްކާ ގޮތުގައި ސްޕެއިންއަށް އަރާފައިވާ ތޫފާނަކީ 1967 ވަނަ އަހަރު ޕޯޗުގަލްއަށް އެރި ތޫފާނަށްފަހު ޔޫރަޕު ދުށް އެންމެ ނުރައްކާތެރި ތޫފާނެވެ.
