އެރިކް ޓެންހާގް, މެންޗެސްޓާ ޔުނައިޓެޑުގެ ކޯޗު ކަމުން ވަކިކުރުމުން އެކަމާ މެދު ހިތާމަ ކުރާ ކަމަށް އެ ޓީމުގެ ކެޕްޓަން ބްރޫނޯ ފާނަންޑޭޒް ބުނެފިއެވެ.
ސްކައި ސްޕޯޓްސްއަށް ދިން ބަސްދީގަތުމެއްގައި ވާހަކަ ދައްކަމުން ފާނަންޑޭޒް ހާމަކުރި ގޮތުގައި, ޔުނައިޓެޑުން ޓެންހާގް ކޯޗުކަމުން ވަކިކުރިކަން އެނގުމާއެކު އޭނާ ވަނީ ޓެންހާގަށް ގުޅާ, ކުޅުންތެރިންގެ ފަރާތުން މައާފަށް އެދިފައި ކަމަށެވެ.
"ވަރަށް ހިތާމަ ކުރަން އަހަރެމެންގެ ދަށް ކުޅުމުގެ ސަބަބުން ޓެންހާގް ކޯޗުކަމުން ވަކިކުރީމަ. ޓީމުގެ ކެޕްޓަނުގެ ގޮތުގައި ހުރެ އެކަމުގެ ޒިންމާ އަހަރެންގެ ބޮލުގައި އޮތް ކަމަށް ގަބޫލުކުރަން. އެކަމަކު ހަގީގަތަކީ 15 ކުޅުންތެރިން ފޮނުވާލުމަށްވުރެ އެއް ކޯޗު މަގާމުން ވަކިކުރަން މެނޭޖްމަންޓަށް މާ ފަސޭހަ" ޓެންހާގާ ބެހޭ ގޮތުން ވާހަކަދައްކަމުން ފާނަންޑޭޒް ބުންޏެވެ.
ފާނަންޑޭޒް ވަނީ, ރޭ އިނގިރޭސި ޕްރިމިއާ ލީގުގައި ޗެލްސީ އަތުން 1-1 އިން އެއްވަރުވި މެޗުގައި ލަނޑެއް ކާމިޔާބު ކޮށްފައެވެ. ފަހު ފަސްވަރަކަށް އަހަރު ތެރޭ ޔުނައިޓެޑުގެ ކޯޗުކަމުގެ މަގާމަށް އެތައް ފަރާތެއް ހަވާލުވި ކަމުގައިވިއަސް, ފާނަންޑޭޒް ވަނީ އެ ހުރިހާ ކޯޗެއްގެ އިރުޝާދުގެ ދަށުގައި ވެސް ރަނގަޅު ކުޅުމެއް ދައްކާފައެވެ.
ޔުނައިޓެޑުގެ ކޯޗުކަމުގެ މަގާމަށް ދާދި ފަހުން ސޮއި ކުރި ރުބެން އެމޮރިމް ރަސްމީކޮށް ޔުނައިޓެޑުގެ ކޯޗުކަމާ ހަވާލުވަންދެން, އިންޓެރިމް މެނޭޖަރުގެ ގޮތުގައި ހުރި ރޫޑް ވެން ނިސްލްރޯއީގެ އިރުޝާދުގެ ދަށުން ކުޅެމުން އަންނަ ޔުނައިޓެޑު ދެން ނިކުންނާނީ ޔޫރޮޕާ ލީގުގައި 8 ނޮވެންބަރު ވާ ދުވަހު, ޕީ.އޭ.އޯ.ކޭ އެފްސީއާ ދެކޮޅަށެވެ.
