ތުރުކީގެ ސުޕަ ލީގްގައި ރޭގައި ޓްރަބްޒޮންސްޕޯ އަތުން ފެނެބާޗޭ 3-2 އިން ކުރި ހޯދި މެޗުގައި, ވީޑިއޯ އެސިސްޓެންޓް ރެފްރީގެ ނިންމުންތަކަށް ފެނެބާޗޭގެ ކޯޗު ހޯސޭ މޮރީނިއޯ ފާޑުކިޔައިފިއެވެ.
ރޭގައި ކުޅެވިގެންދިޔަ ފޯރިގަދަ މެޗުގައި ރެފްރީ ވަނީ ޓްރަބްޒިންސްޕޯއަށް ދެ ޕެނަލްޓީ ދީފައެވެ. މި ދެ ޕެނަލްޓީ ވެސް އެ ޓީމުން ކާމިޔާބު ކުރި އިރު, ހޯސޭގެ ފެނެބާޗޭއަށް މެޗު ކާމިޔާބު ކުރެވުނީ ނުވަދިހަ މިނެޓު ހަމަވެ ކުޅުނު އިތުރު ވަގުތުގެ 12 ވަނަ މިނެޓުގައި ޖެހުނު ލަނޑަކުންނެވެ.
މި މެޗުގައި ފެނެބާޗޭއާ ދެކޮޅަށް އެތައް މުހިއްމު ނިންމުމެއް ގޮސްފައިވާއިރު, މެޗަށްފަހު ވާހަކަދައްކަމުން މޮރީނިއޯ ވަނީ ވީޑިއޯ އެސިސްޓެންޓް ރެފްރީގެ ގޮތުގައި ހުރި އަޓިޔާ ކަރަގައޮލޮންއަށް ފާޑުކިޔާފައެވެ.
"އަނެއް ޓީމުން ނުރައްކާތެރި ފައުލެއް ކޮށްގެން ވީއޭއާރު ބަލާ ރަތް ކާޑު ދައްކަން ޖެހުނު އިރު ވެސް ރެފްރީއަށް އެ ނިންމުމެއް ނުނެގުން. އަހަންނަށް ހީވަނީ އޭނާ (އަޓިޔާ) ހުރީ ކޮފީ ބޯންހެން." އަޓިޔާގެ ނިންމުންތަކަށް ފާޑު ކިޔަމުން މޮރީނިއޯ ބުންޏެވެ.
މޮރީނިއޯ ބުނި ގޮތުގައި ރޭގެ މެޗުގައި ހިނގި ކަންކަމާ ގުޅިގެން ޓްރަބްޒިންސްޕޯއާ ދެކޮޅަށް އޭނާގެ ހިތުގައި އެއް ވެސް އެއްޗެއް ނެތް ކަމަށާއި ރެފްރީގެ ނިންމުންތަކުގެ ސަބަބުން އިދިކޮޅު ޓީމާ މެދު ހިތުގައި ދެކޮޅުވެރިކަމެއް ނުބަހައްޓާނެ ކަމަށެވެ.
އޭގެ އިތުރުން މޮރީނިއޯ ވަނީ, މީގެ ފަހުން ފެނެބާޗޭ ކުޅޭ އެއް ވެސް މެޗަކަށް އަޓިޔާ ރެފްރީއަކަށް ނުބެހެއްޓުމަށް ސުޕާ ލީގަށް ގޮވާލައިފައެވެ.
