ލޮލުގެ ފަރުވާއަށް ބޭނުންކުރާ އަގުބޮޑު އިންޖެކްޝަނެއް ކަމަށްވާ "ލުސެންޓިސް އިންޖެކްޝަން" އާސަންދައަށް ބިލްކުރުމުގައި ނާޖާއިޒު ބޮޑު ފައިދާއެއް ނަގަމުންދާކަން ހާމަވެ އެމައްސަލަ ހައްލުކުރަން މަސައްކަތް ކުރަމުންދާކަމަށް ރައީސް އޮފީހުގެ ޗީފް ސްޕޯކްސްޕާސަން އަދި އެންސްޕާގެ ސީއީއޯ ހީނާ ވަލީދް ވިދާޅުވެއްޖެއެވެ.
ސޯޝަލް މީޑިއާގައި ދައުރުވަމުންދިޔަ މެސެޖަކާ ގުޅިގެން ހީނާ ވަލީދު ކުރެއްވި ޕޯސްޓެއްގައި ވިދާޅުވި ގޮތުގައި، އާސަންދައިގެ ބޭހުގެ އަގު މުރާޖަޢާކުރުމުގެ ތެރެއިން މިކަން ވަނީ ފާހަގަކުރެވިފައެވެ. އޭގެ ތެރޭގައި، ލޮލުގެ ފަރުވާގެ ޚިދުމަތްދޭ އަމިއްލަ ފަރާތަކުން 500 ޑޮލަރަށް ގަންނަ އިންޖެކްޝަނެއް 23,000 ރުފިޔާއަށް އާސަންދައަށް ބިލްކޮށްފައިވާކަން ފާހަގަކުރެއްވިއެވެ. މިއީ އެންމެ އިންޖެކްޝަނަކުން 14,000 ރުފިޔާގެ ފައިދާއެއް ނެގުން ކަމަށް ހީނާ ވިދާޅުވިއެވެ.
އެގޮތުން، މި އިންޖެކްޝަން ޖަހާ މީހަކު ސޯޝަލް މީޑިއާގައި ވަނީ އޭނާގެ މަންމަގެ ލޮލަށް ޖަހާ 25،000ރ. ގެ އިންޖެކްޝަން މީގެ ކުރިން އާސަންދައިން ކަވަރު ކުރިނަމަވެސް މިހާރު ނުކުރާ ކަމަށް ބުނެ ޝަކުވާކޮށްފައެވެ.
ހީނާ އިތުރަށް ހާމަކުރެއްވި ގޮތުގައި، މި އިންޖެކްޝަން އެތެރެކުރަން ރަޖިސްޓަރީކޮށްފައިވަނީ އެހެން ކުންފުންޏަކުން ކަމަށާއި، ނަމަވެސް އެ ފަރާތުން މި ބޭސް އެތެރެކޮށްފައި ނުވާ ކަމަށެވެ. އަދި ލޮލުގެ ފަރުވާގެ ޚިދުމަތްދޭ ފަރާތުން ބޭސް ވިއްކާފައިވަނީ ބޭސް އެތެރެކުރުމަށް ރަޖިސްޓަރީ ނުކޮށް ޕްރިސްކްރިޕްޝަނަށް ކަމަށް ވެސް ހީނާ ފާހަގަކުރެއްވިއެވެ.
މި މައްސަލަ ހުއްޓުވުމަށް ފިޔަވަޅު އަޅައި، އެންސްޕާގެ ވެލްފެއަރ އެހީގެ ދަށުން މިހާރުވެސް ކޮންޓްރޯލްކުރެވިފައިވާ އަގެއްގައި ބޭނުންވާ ފަރާތްތަކަށް މި ބޭސް ހޯދުމަށް އެހީތެރިކަން ދެމުންދާ ކަމަށް ހީނާ ވިދާޅުވިއެވެ. އަދި މިކަން އިތުރަށް ފުރިހަމަކުރުމުގެ މަސައްކަތް ކުރިއަށްދާ ކަމަށް ވެސް ވިދާޅުވިއެވެ.
ހީނާ ވިދާޅުވި ގޮތުގައި، އަމިއްލަ ފަރާތްތަކުން ވިޔަފާރީގެ ފައިދާގެ ބޭނުމަށް އާސަންދަ ބޭނުންކުރުމުގެ ނަތީޖާއެއްގެ ގޮތުން ރައްޔިތުންނަށް ބޮޑެތި ގެއްލުން ލިބެމުންދާ ކަމަށާއި، މިކަން ހުއްޓުވުމަށް ރައީސްގެ ލަފާފުޅުގެ ދަށުން މަސައްކަތްކުރާނެ ކަމަށެވެ.
