ރާއްޖޭގެ ސިނާއަތްތަކުގެ ތެރެއިން އެންމެ ގޮންޖެހުން ބޮޑު ސިނާއަތަކީ މަސްވެރިކަމުގެ ސިނާއަތް ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވެފައިވަނީ ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
މީގެއިތުރުން އެމަނިކުފާނު ވިދާޅުވީ މަސް ދޯނިފަހަރު ތަރައްގީވެގެން އާއިރު، މަސްވެރިކަމުގެ ވަސީލަތްތައް ތަރައްގީވެފައި ނެތުން އެއީ އެންމެބޮޑު އެއް މައްސަލަ ކަމަށެވެ.
ހަމައެއާއެކު އެމަނިކުފާނުގެ ވާހަކަފުޅުގައި މަސްވެރިކަން ތަރައްގީކުރުމަށް ކުރަމުންގެންދާ މަސައްކަތްތަކުގެ ދަށުން މަސް ފިނިކޮށް ރައްކާކުރެވޭ ކެޕޭސިޓީ އިތުރުކުރުމުގެ މަސައްކަތްތައް ކުރިއަށްދާކަމަށާއި އެގޮތުން ކުރެވޭ މަސައްކަތްތަކާއެކު، 4،250 ޓަނަށް މަސް ރައްކާކުރުމުގެ ކެޕޭސިޓީ އިތުރުވެގެންދާނޭކަން ފާހަގަކުރައްވިއެވެ.
ޝިޔާމް ވިދާޅުވީ، މި ސަރުކާރުން މަސްވެރިންނަށް ދޫކުރަން ބުނި ފައިސާ، މިދިޔަ މަހުގެ 27 ނިޔަލަށް ދޫކޮށް ނިންމާފައިވާކަމަށާއި ސަރުކާރު ވެރިކަމާ ހަވާލުވުމަށްފަހު އެ ދުވަހުގެ ނިޔަލަށް 1.04 ބިލިއަން ރުފިޔާ މަސްވެރިންނަށް ދޫކޮށްފައިވާކަމަށެވެ.
އަދި މަސްވެރިންނަށް ސަރުކާރުން ވީ ވައުދާ އެއްގޮތަށް ކަންކަން ކުރަމުންގެންދާނޭކަމަށާއި، އެކަން މިހާތަނަށް ފެނިގެންގޮސްފައިވާކަން ވަޒީރު ޝިޔާމްގެ ވާހަކަފުޅުގައި ވިދާޅުވެފައިވެއެވެ.
