އިސްލާމް ދީނުގައި ކައިވެންޏާއި ވަރީގެ ކަންކަމަކީ ސަމާސާ ކަންކަން ނޫން ކަމަށް މިއަދުގެ ހުކުރު ޚުތުބާގައި ވިދާޅުވެއްޖެއެވެ.

ހުކުރު ޚުތުބާގައި ވިދާޅުވީ ކައިވެންޏާއި ވަރިއަކީ އޭގައި ސަމާސާ ކުރުން ހިމެނޭ ކަންކަމެއް ނޫން ކަމަށެވެ. އަދި ވަރިއަކީ އޭގައި ފިގްހީ އެތައް ހުކުމެއް ހިމެނޭ ކަމެއް ކަމަށް ވެސް ޚުތުބާގައި ވިދާޅުވިއެވެ.

ރަސޫލާ ހަދީޘް ކުރެއްވި ބަސްފުޅެއްގެ މާނައިގައިވެއެވެ. "ތިން ބަހެއް ގަސްތަކާއި ލައިގެން ނުވަތަ ސަމާސާއަކަށް ބުނި ކަމުގައި ވިޔަސް، އެ ކަންކަމުގެ ހުކުމް ހިނގާނެއެވެ. އެއީ ކައިވެނި ކުރުމާއި، ވަރި ކުރުމާއި ކައިވެނި ރުޖޫޢަ ކުރުމެވެ."

ޚުތުބާގައި އިތުރަށް ވިދާޅުވީ ޝަރުޢީ ސަބަބެއް ނެތި، ފިރިމީހާގެ ގާތުން ވަރިއަށް އެދުމަކީ އިސްލާމްދީން ނަހީ ކުރައްވާފައިވާ ކަމެއް ކަމަށެވެ. ރަސޫލާގެ ހަދީޘެއްގެ މާނައިގައިވެއެވެ. "ހައްޤަކާ ނުލައި، ފިރިމީހާގެ ގާތުން ވަރިވާން އެދޭ އަންހެނާގެ މައްޗަށް ސުވަރުގޭގެ ވަސް ވެސް ހަރާމް ވެގެންވެއެވެ."

މީގެ އިތުރުން ފަށްކެނޑުމުގެ ނިޔަތުގައި ކައިވެނި ކުރުމުގެ ނުބައި ކަމުގެ މައްޗަށްވެސް މިއަދުގެ ޚުތުބާގައި ވަނީ އަލިއަޅިވާލާފައެވެ. މިގޮތުން ތިން ފަށްވެފައިވާ އަންހެނާ، އޭނާ ވަރިކުރި މީހާއާ އިނުމުގެ ނިޔަތުގައި، ފަށްކަނޑާން މީހަކާ އިނުމަކީ ހަރާމްކަމެއް ކަމުގައި މިއަދުގެ ހުކުރު ޚުތުބާގައި ވިދާޅުވިއެވެ. އަދި ފަށްކަނޑާން ކައިވެނި ކުރާ މީހުންނަށް މާތްﷲ ލައުނަތް ލައްވާފައިވާކަން ކީރިތި ރަސޫލާގެ ހަތީޘުން ސާބިތުވާކަމަށްވެސް ހުކުރު ޚުތުބާގައި ވިދާޅުވިއެވެ.

އިތުރު ލިޔުންތައް ދީނީ ވާހަކަ