އާސަންދައަށް ގެނެވޭ އިސްލާހުތަކުން ރައްޔިތުންނަށް އެއްވެސް ނޭދެވޭ އަސަރެއް ނުކުރާނެ ކަމަށް ސިއްހީ ވަޒިރު ޢަބްދުﷲ ނާޒިމް ވިދާޅުވެއްޖެއެވެ.
ވަޒީރު މިހެން ވިދާޅުވީ ހެލްތު އެކްސްޕޯ 2024 ގެ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ވަޒިރު ޢަބްދުﷲ ނާޒިމް ވިދާޅުވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން އާސަންދަ ނިޒާމު ހަރުދަނާކުރުމަށް ކުރެވޭ މަސައްކަތްތަކަކީ ރައްޔިތުންނަށް އިތުރު ބުރައެއް އުފުލަން ޖެހޭ ގޮތަށް ކުރެވޭ ކަންކަމެއް ނޫނެވެ. އޭގެ ބަދަލުގައި މި އިސްލާހުތަކަކީ ރައްޔިތުންނަށް އިތުރަށް ފަސޭހަވާނެ ގޮތަށް ގެނެވޭ ބަދަލުތަކެއް ކަމުގައި އެމަނިކުފާނު ވިދާޅުވިއެވެ.
މީގެ އިތުރުން، އާސަންދަ ނިޒާމުގައި ހުރި މައްސަލަތައް ހައްލުކުރުމަށާއި އެ ނިޒާމު އިތުރަށް ހަރުދަނާކުރުމަށް ބޭނުންވާ ފިޔަވަޅުތައް ދެނެގަތުމަށް ސަރުކާރުން މާހިރުންގެ ލަފާ ހޯދާނެ ކަމަށްވެސް ވަޒީރު ވިދާޅުވިއެވެ. މިހާރު ހުރި މައްސަލަތައް ހައްލުނުކޮށް ދޫކޮށްލައިފިނަމަ، މުސްތަޤުބަލުގައި އޭގެ ސަބަބުން އުފުލަންޖެހޭ ބުރަ އިތުރުވާނެ ކަމަށްވެސް އެމަނިކުފާނު ފާހަގަކުރެއްވިއެވެ.
އާސަންދަ ނިޒާމަށް ގެނެވޭ އެންމެ ފާހަގަކޮށްލެވޭ އެއް ބަދަލަކީ އައުޓްޕޭޝަންޓް ޚިދުމަތްތަކަށް ޕްރައިވެޓް އިންޝުއަރެންސް އިސްކުރުމެވެ. ނަމަވެސް، ޕްރައިވެޓް އިންޝުއަރެންސް ނެތް ފަރާތްތަކަށާއި، ވަކި ޚިދުމަތްތަކެއް ޕްރައިވެޓް އިންޝުއަރެންސްއިން ނުލިބޭ ފަރާތްތަކަށް އާސަންދައިގެ ޚިދުމަތް ކުރިއެކޭ އެއްގޮތަށް ލިބޭނެ ކަމަށް ސަރުކާރުން ވަނީ ޔަގީންކޮށްދީފައެވެ.
