މިސީޒަނުގައި ބޮޑު ޓީމެއް، ކުޑަ ޓީމެއް ނުބަލައި ގިނަ ލަނޑުތަކެއް އިދިކޮޅު ޓީމުތައް ކޮޅަށް ޖަހަމުން ދިޔަ ބާސެލޯނާގެ މައްޗަށް 1-0 އިން ކުރި ހޯދައި، ރެއާލް ސޮސިއެޑާޑުން ބާސެލޯނާ ހަމަބިމަށް ރޭ ތިރިކޮށްފިއެވެ.
ސޮސިއެޑާޑުގެ ދަނޑުގައި ކުޅުނު މިމެޗުގައި ބާސެލޯނާ ކޮޅަށް އެޓީމުން ލަނޑު ޖެހީ 33 ވަނަ މިނެޓުގައެވެ. މި ލަނޑު ކާމިޔާބު ކޮށްދިނީ ޝެރަލްޑޯ ބެކާއެވެ. އޭގެ ކުރިން ބާސެލޯނާގެ ފޯވާޑް ރޮބާޓް ލެވަންޑޮސްކީ ލަނޑެއް ޖެހިއެވެ. އެކަމަކު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.
ބާސެލޯނާގެ ކޯޗް ހަންސީ ފްލިކް މެޗަށްފަހު ބުނީ ލެވަންޑޮސްކީ ޖެހި ލަނޑު އޮފްސައިޑް ނޫންކަން ރިޕްލޭއިން ފެންނަ ކަމަށެވެ. "ރަނގަޅު ލަނޑެއް އެއީ. ރެފްރީން ކުއްވެރިކުރާކަށް ބޭނުމެއް ނޫން، ރެފްރީންނަށްވެސް ގޯސް ހެދޭނެ. އެއީ ވެސް އިންސާނުން" ފްލިކް ބުންޏެވެ.
މިއީ ސްޕެނިޝް ލަލީގާގައި މިސީޒަނުގައި ބާސެލޯނާ ބަލިވި 2 ފަހަރެވެ. މިމެޗުގައި އަނިޔާގެ ސަބަބުން ލަމީން ޔަމާލް ނުކުޅެއެވެ.
މި މެޗުން ބަލިވިނަމަވެސް ބާސެލޯނާ އޮތީ ލީގުގެ އެއްވަނައިގައެވެ. އެއީ 13 މެޗުން 33 ޕޮއިންޓް ހޯދައިގެންނެވެ. 12 މެޗުން 27 ޕޮއިންޓް ހޯދައިގެން ދެވަނައިގައި އޮތީ އެންމެފަހުގެ ޗެމްޕިއަން ރެއާލް މެޑްރިޑެވެ. ސޮސިއެޑާޑް 8 ވަނައިގައި އޮތީ 18 ޕޮއިންޓާއެކުއެވެ.
