އާޖެންޓީނާގެ ފުޓުބޯޅަ ލީގުގެ މެޗެއްގައި ސޯޝަލް މީޑިއާ އިންފްލުއެންސަރެއް ކުޅެން އެރުވުމުން އިދިކޮޅު ޓީމުގެ ކުޅުންތެރިން ނުރުހުން ފާޅުކޮށްފިއެވެ.
މި ސްޓަންޓް ޖައްސާފައިވަނީ އާޖެންޓީނާގެ ކްލަބެއް ކަމުގައިވާ ޑިޕޯޓީވޯ ރިއެސްޓްރާ, ވެލޭ ސާސްފިލްޑްއާ ދެކޮޅަށް ކުޅުނު މެޗުގައެވެ.
މި މެޗުގެ ފުރަތަމަ އެގާރައިގައި ޑިޕޯޓީވޯއިން ވަނީ ސައުރު އެމެރިކާގެ މަޝްހޫރު ސޯޝަލް މީޑިއާ އިންފްލުއެންސަރެއް ކަމުގައިވާ އިވަން ބުހަޖެރުކް ހިމަނާފައެވެ. މެޗު ފެށިގެން އެންމެ މިނެޓެއް ތެރޭގައި އޭނާގެ ބަދަލަށް އެހެން ކުޅުންތެރިޔެއް އެރުވި ކަމުގައިވިއަސް ވެލޭގެ ކުޅުންތެރިން ވަނީ ޑިޕޯޓީވޯގެ މި ސްޓަންޓަށް ފާޑު ކިޔާފައެވެ.
"މިއީ ފުޓުބޯޅައާ ދެކޮޅަށް ހިންގި އަމަލެއް. މި ސްޓަންޓުގެ ސަބަބުން ޕްރޮފެޝަނަލް ފުޓުބޯޅަ ކުޅުމަށް މަސައްކަތް ކުރަމުންދާ ކުޑަ ކުދިންނަށް ލިބޭނީ ވަރަށް ނުބައި މެސެޖެއް." ޑިޕޯޓީވޯގެ ސްޓަންޓާ ބެހޭ ގޮތުން ވާހަކަދައްކަމުން ވެލޭގެ ސްޓަރިކަރު ބްރަޔަން ރޮމޭރޯ ބުންޏެވެ.
ޑިޕޯޓީވޯ ރިއެސްޓްރާގެ އެގްޒެކަޓިވުން ވަނީ އެ ޓީމުގެ މި ސްޓަންޓް ދިފާއުކޮށްފައެވެ. އެ ޓީމުގެ އެގްޒެކަޓިވުން މި މައްސަލައާ ބެހޭ ގޮތުން ބުނީ އެއީ އެ ޓީމުގެ މެއިން ސްޕޮންސަރާއެކީ ހެދި އެއްބަސްވުމެއްގެ ދަށުން ކުރި ކަމެއް ކަމުގައެވެ.
