ކެރިއަރުގައި ދެވަަނަ ފަހަރަށް ރެއާލް މެޑްރިޑަށް ދިއުމުގެ ވިސްނުމެއް ނެތް ކަމަށް މި ދިޔަ ސީޒަނުގެ ފަހު ކޮޅު އެ ޓީމު ދޫކޮށް ސައުދީ އަރަބިއާއަށް ބަދަލުވި ޑިފެންޑަރު ނާޗޯ ފާނަންޑޭޒް ބުނެފިއެވެ.
މި ދިޔަ ސީޒަނުގައި ރެއާލު ދޫކޮށް, ސައުދީގެ އަލްގަދްސިއާއަށް ބަދަލުވި, 34 އަހަރުގެ ނާޗޯ ވަނީ, މީޑިއާއަކަށް ދިން ހާއްސަ ބަސްދީގަތުމެއްގައި އެނބުރި ރެއާލަށް ދިއުމުގެ ވިސްނުމެއް ނެތް ކަމަށް ހާމަކޮށްފައެވެ.
"ރެއާލުން އަހަންނަށް ގުޅިޔަސް އެ ކްލަބަކަށް ނުދާނަން. އަހަރެން ވަރަށް ވިސްނާފަ ރެއާލު ދޫކޮށްލަން ނިންމީ. ރެއާލުގައި ދެން އަހަންނަށް ކުރިމަގެއް ނެތް. އަހަރެން ވަރަށް އުފަލުން ސައުދީގަ މިހުރީ." އެނބުރި ރެއާލަށް ނުދާނެ ކަމަށް ހާމަކުރަމުން ނާޗޯ ބުންޏެވެ.
ނާޗޯގެ މި ބަސްތައް އައިސްފައި މިވަނީ ރެއާލް މެޑްރިޑުގެ ހަތަރު ޑިފެންޑަރުން އިންޖަރީވެ, ޑިފެންޑަރުންނަށް ބޭނުން ޖެހިފައިވާ ދަނޑިވަޅެއްގައެވެ. ނާޗޯއަކީ, ބަދަލު ޑިފެންޑަރެއްގެ ގޮތުގައި ރެއާލުގައި އެތައް ދުވަހެއް ހޭދަކޮށް ތަޖުރިބާ ލިބިފައިވާ ކުޅުންތެރިޔަކަށް ވާތީ, ރެއާލުން އޭނާ އަނބުރާ ގެނައުމަށް މަސައްކަތް ކުރުމަކީ އެކަށީގެންވާ ކަމެކެވެ.
ނަމަވެސް ނާޗޯ, އެ ފަދަ ޓްރާންސްފާއަކަށް އެއް ވެސް ފުރުސަތެއް ނެތް ކަން ހާމަކުރުމާއެކު ރިޕޯޓުތަކުން ލަފާ ކުރަނީ ރެއާލުން ކުރިއަށް އޮތް ޖަނަވަރީ ޓްރާންސްފާ ވިންޑޯގައި ނަން މަޝްހޫރު ޑިފެންޑަރެއް ގަތުމަށް މަސައްކަތް ކުރާނެ ކަމަށެވެ.
