ރާއްޖެއަށް ޗުއްޓީއަކަށް އައިސްފައިވާ އިންޑިއާގެ މަޝްހޫރު އެކްޓްރެސް ހީނާ ޚާން، ކެންސަރާ ކުރިމަތިލަމުން ދިޔުމުގައިވެސް ރާއްޖޭގައި އުފާވެރި ވަގުތުތަކެއް ހޭދަކުރަމުންދާކަން އޭނާގެ އިންސްޓަގްރާމް ޕޯސްޓްތަކުން ދައްކާލައިފިއެވެ.
ސްޓޭޖް 3 ކެންސަރާ ކުރިމަތިލަމުންދާ ހީނާ ޚާން މިހާރު ދަނީ ރާއްޖޭގައި ޗުއްޓީއެއް ހޭދަކުރަމުންނެވެ. އޭނާ އެންމެ ފަހުން ޝެއަރކޮށްފައިވާ ވީޑިއޯއެއްގައި ކޯމަސް ކްރޫޒްއެއްގައި އުފާވެރިކަމާއެކު ބައިވެރިވި މަންޒަރު ފެނިގެންދެއެވެ. މި ވީޑިއޯގައި ހީނާ ކުޑަކުއްޖަކު އުރައިލައިގެން، ކޯމަސް ބަލާ މަންޒަރު ފެނިގެންދެއެވެ. "މިއީ އަހަރެން ދުށް އެންމެ ރީތި ޑޮލްފިން ކްރޫޒް،" މިހެން ލިޔެ ހީނާ ވަނީ މި ވީޑިއޯ ކެޕްޝަން ކޮށްފައެވެ.
މީގެ އިތުރުން ހީނާ ވަނީ ސްނޯކްލިންގ ކުރުމާއި، އަސްދުއްވުމާއި، އަދި ޕޫލްސައިޑް ކެއުމެއްގައިވެސް ބައިވެރިވެފައެވެ. ކުލަގަދަ މެކޯ ދޫނިތަކާއެކު ނެގި ފޮޓޯތައްވެސް ހީނާ ވަނީ އިންސްޓަގްރާމްގައި ޝެއަރކޮށްފައެވެ.
ޗުއްޓީގެ އުފާވެރި މަންޒަރުތަކާއެކު، ހީނާ ވަނީ އޭނާގެ ބަލީގެ ހާލަތާ ގުޅޭ މައުލޫމާތުވެސް ޝެއަރކޮށްފައެވެ. އެގޮތުން ކީމޯތެރަޕީގެ ދަތުރުގެ ފޮޓޯތައްވެސް އެނާ ހިއްސާކޮށްފައިވެއެވެ.
ޚަތުރޯން ކޭ ކިލާޑީ 8 އާއި ބިގް ބޮސް 11 ފަދަ މަޝްހޫރު ޕްރޮގްރާމްތަކުގައި ބައިވެރިވެފައިވާ ހީނާ ޚާން، އޭނާގެ ހާލަތުގައިވެސް އުފާވެރިކަމާއި ހިތްވަރުގަދަކަން ދައްކުވައިދެމުން ދިޔުމުން، ދިރިއުޅުމުގެ ގޮންޖެހުންތަކާ ކުރިމަތިލާއިރު ހިތްވަރުގަދަކަމާއެކު ކުރިއަށްދެވިދާނެކަން ސާބިތުކޮށްދެއެވެ.
