ތ. ގުރައިދޫ އެއަރޕޯޓް ތަރައްޤީކުރުމަށް ބޭނުންވާ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢު ސަރުކާރުން މިއަދު އެމްޓީސީސީއާ ހަވާލުކޮށްފިއެވެ.
މި މަޝްރޫޢު ހަވާލުކުރުމަށް މިއަދު ބޭއްވުނު ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ ޑީ.ސީ.ޕީ. (ރިޓަޔަރޑް) އަހުމަދު ސައުދީއެވެ. އަދި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޮރ ކޮންސްޓްރަކްޝަން އެންޑް އިންފްރާސްޓްރަކްޗަރ، އިބްރާހިމް ތޮޢާމް މުޙައްމަދުއެވެ.
މި މަޝްރޫޢުގެ ދަށުން 378,350 ކިއުބިކް މީޓަރުގެ ބިން ހިއްކުމާއި، 979 މީޓަރުގެ ރިވެޓްމަންޓެއް އަދި 609 މީޓަރުގެ ޖިއޯބޭގް ރިވެޓްމަންޓެއް ހެދުން ހިމެނެއެވެ. މި މަޝްރޫޢުގެ އަގަކީ 106.02 މިލިއަން ރުފިޔާ ކަމަށާއި، މަޝްރޫޢު ނިންމުމަށް 300 ދުވަސް ދީފައިވާ ކަމަށް އެމްޓީސީސީއިން މަޢުލޫމާތު ދެއެވެ.
2،272 މީހުން ދިރިއުޅޭ ތ. ގުރައިދޫއަކީ އެ އަތޮޅުގެ ގިނަ ބަޔަކު ވިޔަފާރީގެ ބޭނުންތަކުގައި ޒިިޔާރަތްކުރަމުން އަންނަ ރަށެކެވެ. މި ރަށުގެ އިޤްތިޞާދު ބިނާވެފައިވަނީ މަސްވެރިކަމާއި، ދަނޑުވެރިކަމާއި، ފަން ވިޔުމާއި އަދި ފަތުރުވެރިކަމުގެ މައްޗަށެވެ. މި ރަށުގައި އެއަރޕޯޓެއް ގާއިމުކުރުމަކީ ރަށުގެ ރައްޔިތުންގެ ވަރަށް ގިނަ ދުވަހުގެ އުންމީދެކެވެ.
ބިން ހިއްކުމާއި އެއަރޕޯޓް ތަރައްޤީކުރުމުގެ މަޝްރޫޢުގެ ސަބަބުން ގުރައިދޫގެ އިޤްތިޞާދަށާއި މުޅި ތ. އަތޮޅުގެ އިޤްތިޞާދަށް ކުރިއެރުން ލިބޭނެ ކަމަށް އުންމީދުކުރެވެއެވެ. މި މަޝްރޫޢުގެ ސަބަބުން ރަށުގެ ރައްޔިތުންނަށް އިތުރު ވަޒީފާގެ ފުރުޞަތުތައް ހުޅުވި، ވިޔަފާރިތައް ފުޅާވެގެންދާނެ ކަމަށްވެސް ބެލެވެއެވެ.
