މެންޗެސްޓާ ޔުނައިޓެޑަށް ސޮއި ކުރުމުގެ ވިސްނުމެއް އަދި ނުގެންގުޅޭ ކަމަށް, ޔޫރަޕުގައި މިހާރު އެންމެ އަލިގަދަކޮށް ވިދަމުން އަންނަ އެއް ސްޓްރައިކަރު ކަމުގައިވާ ވިކްޓޯ ގިއޯކަރޭޝް ބުނެފިއެވެ.
ޕޯޗުގަލްގެ ސްޕޯޓިންއަށް ކުޅެމުން އަންނަ 26 އަހަރުގެ ހުނަރުވެރި ސްޓްރައިކަރު ބުނި ގޮތުގައި އޭނާ ޔުނައިޓެޑާ ގުޅޭނެ ކަމަށް ފެތުރޭ ހަބަރުތަކަކީ އެއް ވެސް ހަގީގަތެއް އެކުލެވޭ ވާހަކަތަކެއް ނޫން ކަމަށެވެ.
"ޔުނައިޓެޑާ ގުޅުމަކީ މި ވަގުތު އަހަރެން ވިސްނާ ކަމެއް ނޫން. ޔުނައިޓެޑަށް އަހަރެން ސޮއިކުރާނެ ކަމަށް ދެކެވޭ ވާހަކަތަކަކީ ހަގީގަތެއް ހުރެގެން ފެތުރުނު ވާހަކަތަކެއް ނޫން. އަހަރެން ބޭނުންވަނީ ސްޕޯޓިންގަ މި ސީޒަން ނިންމާލަން" ޔުނައިޓެޑާ ގުޅެން އުޅޭ ކަމަށް ބުނާ ވާހަކަތަކަށް ރައްދު ދެމުން ގިއޯކަރޭޝް ބުންޏެވެ.
ގިއޯކަރޭޝް ކުޅެމުން އަންނަ ސަޕޯޓިންގެ ކުރީގެ ކޯޗު, ރުބެން އަމޮރިމް ދާދި ފަހުން ޔުނައިޓެޑުގެ ހެޑް ކޯޗު ކަމުގެ މަގާމަށް އައްޔަނު ކުރުމާއެކު ގިނަ ބަޔަކު އަންނަނީ އަމޮރިމް, ގިއޯކަރޭޝް ޔުނައިޓެޑަށް ގެންނާނެ ކަމަށް ލަފާ ކުރަމުންނެވެ.
މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ ސްވީޑެންގެ ގިއޯކަރޭޝް ވަނީ މި ސީޒަނުގައި ސްޕޯޓިންއަށް ކުޅުނު 16 މެޗު ތެރޭ 23 ލަނޑު ކާމިޔާބު ކޮށްފައެވެ.
