ޕޯޗުގަލް އަތުން 5-1 އިން ޕޮލޭންޑް ބަލިވި މެޗަށްފަހު ކްރިސްޓިއާނޯ ރޮނާލްޑޯއާއެކީ ފޮޓޯއެއް ނެގުމުން ޕޮލޭންޑްގެ ޕިއޯޓާ ޒިލެންސްކީއަށް އެ ގައުމުގެ ސަޕޯޓަރުން ފާޑު ކިޔައިފިއެވެ.
ތަފާތު ބޮޑު ނަތީޖާއަކުން ޕޯޗުގަލް އަތުން ޕޮލޭންޑް ބަލިވިއިރު ވެސް ޒިލެންސްކީ, ޕޯޗުގަލްގެ ސުޕާސްޓާއާއެކީ ފޮޓޯ ނެގުމުން ޕޮލޭންޑްގެ ސަޕޯޓަރުން ވަނީ އޭނާގެ އަމިއްލަ ގައުމީ ޓީމު ދެކެ ލޯބިނުވާކަމަށް ބުނެ, އޭނާއަށް ފާޑުކިޔާފައެވެ.
ސަޕޯޓަރުންގެ މި ތުހުމަތުތަކަށް ރައްދު ދެމުން ޒިލެންސްކީ ވަނީ އޭނާގެ އަމަލުތައް ދިފާއުކޮށްފައެވެ.
"އަހަރެން ފޮޓޯއެއް ނަގަން ބޭނުންވީމަ ރޮނާލްޑޯއާއެކު ފޮޓޯ ނެގީ. އެކަމުގަ އެއް ވެސް މައްސަލައެއް އޮންނަންވީ ކީއްވެ ކަމެއް އަހަންނަކަށް ނޭންގެ. އަހަރެމެން ބަލިވީތީ ކޮޓަރި ކަނެއްގަ ދެރަވެފަ އިންނަން ޖެހޭތަ؟" ސަޕޯޓަރުންގެ ފާޑުކިޔުންތަކަށް ރައްދު ދެމުން ޒިލެންސްކީ ބުންޏެވެ.
ފުޓުބޯޅައިގެ ގިނަ ސަޕޯޓަރުން ވަނީ ޒިލެންސްކީގެ އަމަލު ދިފާއުކޮށްފައެވެ. މިއީ, ރޮނާލްޑޯ ފުޓުބޯޅަ ކުޅޭނެ ފަހު އަހަރުތަކަށްވާއިރު, އޭނާއާއެކީ ފޮޓޯއެއް ނަގާލުމުން އަމިއްލަ ޓީމަށް އެއް ވެސް އިހުތިރާމެއް ނުގެއްލޭނެ ކަމަށް ގިނަ ސަޕޯޓަރުން ވަނީ ވަކާލާތު ކޮށްފައެވެ.
