ޣައްޒާ އާއި ލުބުނާނުގެ ހަނގުރާމައިގައި ބައިވެރިވި ސިފައިންގެ ތެރޭން 6 ސިފައިން ގެ މީހަކު ފާއިތުވި މަސްތަކުގައި އަމިއްލައަށް މަރުވެފައިވާކަން އިޒްރޭލު މީޑިއާއިން ކަށަވަރުކޮށްދެ އެވެ.
މީޑިއާ ރޕޯޓުގައި ބުނަނީ، މި އަދަދަކީ "އަމިއްލައަށް މަރުވި ސިފައިންގެ އަދަދުގެ ބައިކުޅަ ބައެއް" ކަމަށާއި، އަމިއްލައަށް މަރުވާ މީހުންގެ އަދަދާ ބެހޭ މައުލޫމާތު ޒަޔަނިސްޓުންގެ ސިފައިން ޝާއިއު ކުރަން ދެކޮޅު ހަދާކަމަށެވެ.
"ނަފްސާނީ ދަތިކަމުގެ މިންވަރު ސާފުވާނީ ހަނގުރާމަ ނިމުމުން" ކަމަށް ވެސް ބުނެފައި ވެއެވެ.
އިޒްރޭލު ސިފައިންގެ މަސްދަރަކާ ހަވާލާދީ މީޑިއާގައި ބުނެފައި ވަނީ، "ސިފައިންނަށް ޚާއްސަކޮށް ހުޅުވާފައިވާ ނަފްސާނީ ސިއްހަތުގެ ކްލިނިކްތަކުން ފަރުވާ ހޯދާ ސިފައިންގެ އަދަދު ވަނީ އިތުރު ވެފައެވެ."
މީގެ ކުރީ ހަނގުރާމަތަކުގައި ޔަހޫދުންގެ ސިފައިން ޣާއްޒާގައި ބައިތިއްބަނީ މަސް ދުވަހަށެވެ. ނަމަވެސް ކުރު ހަނގުރާމައެއް ކަމަށް ހީކުރި ހަނގުރާމަ ވަނީ 14 މަސް ދުވަހަށް ދެމިގެން ގޮސްފައެވެ.
މި ކަމާ ގުޅޭ ރިޕޯޓުތަކުގައި ބުނެފައި ވަނީ ޣައްޒާގެ ހަނގުރާމައިގައި އުޅުމަށްފަހު ނަފްސާނީ ފަރުވާ ހޯދި ސިފައިންގެ ތެރެއިން ގާތްގަނޑަކަށް 15 ޕަސެންޓް މީހުންނަށް އެނބުރި ހަނގުރާމައަށް އައިސްފައި ނުވާ ކަމަށެވެ.
ޔެޑިއޮތު އަހްރޮނޮތު ނޫހުން ރިޕޯޓްކޮށްފައިވާ ގޮތުގައި "ޣައްޒާ އާއި ލުބުނާނުގައި ހަނގުރާމަކުރި ސިފައިންގެ ކޮންމެ ޔުނިޓަކުން ވެސް ގިނަ އަދަދެއްގެ ސިފައިން ދޫކޮށްލަން ޖެހުނީ ނަފްސާނީ ސިއްހަތާ ގުޅުން ހުރި ސަބަބުތަކަކާ ހުރެ" ކަމަށެވެ.
އެ ނޫހުގައި ބނެފައި ވަނީ މަހެއްގެ މައްޗަށް އެއް ހާސް ސިފައިން ނުކުޅެދޭ ބަޔެއްގެ ގޮތުގައި ލިސްޓު ކުރެވިފައިވާ ކަމަށެވެ. އެގޮތުން ނުކުޅެދޭ ސިފައިން ކަމަށް ލިސްޓުކޮށްފައިވާ މީހުންގެ އަދަދު 12 ހާހަށް ވުރެން އިތުރުވާނެ ކަމަށެވެ. އަދި އަހަރު ނިމޭއިރު ނުކުޅެދޭ މީހުންގެ އަދަދު 20 ހާހަށް އަރާނެ ކަމަށް ލަފާކޮށްފައި ވެއެވެ.
