މަދުން ނަމަވެސް ރާއްޖޭގައި ޖޭސީބީ ގެ ބުލްޑޯޒަރުތަކާއި އެހެން ވެހިކަލް ބޭނުން ކުރެއެވެ. މިއީ ނަސްލު ނައްތާލުމުގެ މަސައްކަތުގައި ހަރަކާތްތެރިވާ ކަމަށް ލޭބަލް ކޮށްފައިވާ ކުންފުންޏެވެ.
މި ކުންފުނީގެ ބުރު ސޫރަ ރީތިކޮށް، ލިޔުންތެރިންގެ ތާއީދު ހޯދުމަށް ކޮންމެ އަހަރަކުވެސް އަދަބީ އިނާމު ދިނުން ބާއްވައެވެ. މިއަހަރުގެ އަދަބީ އިނާމު ދިނުން އޮންނާނީ މިއަދު އެވެ.
އިންޑިއާގެ އަދަބީ ފަންތީގެ ފަރާތްތަކުން ވަނީ މި އިނާމަށް ފާޑު ކިޔާފައެވެ. ޖޭސީބީ ޕްރައިޒް ފޯ ލިޓަރޭޗަރ އިނާމަކީ، 30،000 ޑޮލަރުގެ އިނާމެކެވެ.
އިނގިރޭސިވިލާތުގެ ކޮންސްޓްރަކްޝަން ސާމާނާއި ބުލްޑޯޒަރު އުފައްދާ ކުންފުނި ޖޭސީބީ އަކީ އިންޑިއާއާއި އިޒްރޭލުގައި މީހުންގެ ގެތައް ހަލާކުކޮށްލުމަށް ބޭނުން ކުރާ އާލާތް އުފައްދާ ކުންފުންޏެވެ.
ޖޭސީބީން އިންޑިއާގެ މުސްލިމުންނާއި ބައިމަދު މީހުންގެ ގެތައް ހަލާކުކޮށްލުމުގައި އިސް ދައުރެއް އަދާ ކުރަމުން ދިއުމާ ގުޅިގެން އިންޑިއާގެ ސުޕްރީމް ކޯޓުން ވަނީ ބުލްޑޯޒަރު ޖަސްޓިސްއާ ދެކޮޅަށް ހުކުމެއްވެސް ކޮށްފައެވެ.
އިންޑިއާއާއި އިނގިރޭސިވިލާތުގެ އަދަބީ ފަންތީގެ 120 ފަރާތަކުން ވަނީ އެކުންފުންޏަށް ފާޑު ކިޔައި ސިޓީއެއްވެސް ފޮނުވާފައެވެ.
ޖޭސީބީއަކީ ކޮރަޕްޝަންގައި ތުހުމަތު ކުރެވިފައިވާ ކުންފުންޏެކެވެ. އިނގިރޭސިވިލާތުގެ ކުރީގެ ބޮޑު ވަޒީރު ބޮރިސް ޖޯންސަންގެ ކައިވެނި ޕާޓީ ހަމަޖައްސައި ޚަރަދުތައް ދީފައި ވަނީ ވެސް މިކުންފުނިންނެވެ.
