ސަރުކާރުން ހިންގާމައި ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ)ގެ އެތެރޭގެ އިންތިހާބުގެ ވޯޓުލުން ފަށައިފިއެވެ.
ދަރުބާރުގޭގައި ކުރިއަށްދާ މި އިންތިހާބުގެ ވޯޓްލުން ފެށީ މިއަދު ހެނދުނު 10.00ގައި އެވެ.
ޕީއެންސީން ބުނީ މެންދުރުފަހު 14.00 ހަމައަށް ކުރިއަށް ގެންދާ މި އިންތިހާބުގައި ދަރުބާރުގޭގައި ޖުމުލަ 56 ވޯޓް ފޮށި ބަހައްޓާ ގޮތަށް ހަމަޖެހިފައިވާ ކަމަށެވެ.
މީގެއިތުރުން މާލެ އާއި އަތޮޅުތެރޭގެ، 88 ރަށެއްގައި ވޯޓުލުން ކުރިޔަށްގެންދާ އެ އިންތިހާބުގައި، މާލޭގައި ބަހައްޓާ 56 ވޯޓް ފޮށްޓާއެކު ޖުމުލަ 144 ވޯޓް ފޮށި ބައްޓާނެ ކަމަށްވެސް ރައްޔިތުންގެ މަޖިލީހުގެ ސުޕަ މެޖޯރިޓީ އޮންނަ ޕީއެންސީން ބުންޏެވެ.
ޕީއެންސީގެ އެކި މަގާމުތަކަށް 1984 މީހުން އިންތިހާބު ކުރުމަށް ހަމަޖެހިފައިވާ އިންތިހާބުގައި 648 ކެންޑިޑޭޓުން ވާދަކުރެ އެވެ. އަނެއް 1300 މަގާމަށް، އެންމެ ކެންޑިޑޭޓަކު ކުރިމަތިލާފައިވާތީ، އެ 1300 މަގާމަށް، އިންތިހާބަކާ ނުލައި މީހުން ހޮވިފައިވާ ކަމަށް އެ ޕާޓީން ބުންޏެވެ. މާލެ އާއި އަތޮޅުތެރޭގައި އިންތިހާބު އޮންނަ 88 ރަށުގައި ވޯޓުލުމުގެ ހައްގު ލިބިފައިވާ، 33500 މެމްބަރުން އެބަތިބި އެވެ.
ޕީއެންސީން ބުނި ގޮތުގައި މި އިންތިހާބަކީ މިހާތަނަށް ރާއްޖޭގައި ސިޔާސީ ޕާޓީއަކުން ބާއްވާ އެންމެ ބޮޑު އިންތިހާބު ކަމަށާއި އެގޮތުން މި އިންތިޚާބުގައި ޖުމްލަ 2095 މަޤާމަކަށް މެންބަރުން އިންތިހާބުކުރާނެކަމަށެވެ.
