ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިއްމު ވަޢުދެއް ކަމަށްވާ މާލެ އާއި ވިލިމާލޭގެ މަގުތައް އަލުން ހެދުމުގެ މަޝްރޫޢުގެ މަސައްކަތް ފެށުމަށް ފަހުގެ ތައްޔާރީތައް ނިމިއްޖެއެވެ.
މި މަޝްރޫޢުގެ ފުރަތަމަ މަރުހަލާގެ ގޮތުގައި، ޗައިނާ ސަރުކާރުން ޢައްޔަންކުރި ފަންނީ ޓީމަކުން މަގުތަކުގެ ހާލަތު ދެނެގަތުމުގެ މަސައްކަތް ވަނީ ނިންމާލާފައެވެ.
ކޮންސްޓްރަކްޝަން މިނިސްޓްރީން މަޢުލޫމާތު ދެއްވާފައިވާ ގޮތުގައި، މި އެސެސްމަންޓްގެ މަސައްކަތް ކުރިއަށް ގެންގޮސްފައިވަނީ 5 ނޮވެމްބަރުން 21 ނޮވެމްބަރު 2024 އަށެވެ. މި މުއްދަތުގެ ތެރޭގައި ޗައިނާގެ ސަރުކާރުން ފޮނުވާފައިވާ ޓީމަކުން ވަނީ މިނިސްޓްރީގެ ފަންނީ ޓީމާއެކު މާލެ އާއި ވިލިމާލޭގެ މަގުތަކުގެ ފީސިބިލިޓީ ސްޓަޑީއެއް ހަދާފައެވެ.
މި މަޝްރޫޢުގެ މައިގަނޑު މަޤްޞަދަކީ މިހާރު ހާލަތު ދަށްވެފައިވާ މަގުތައް ޒަމާނީ ފެންވަރަށް ތަރައްޤީކޮށް، ރައްޔިތުންނަށް ފަސޭހަކަމާއެކު ދަތުރުފަތުރު ކުރެވޭނެ މާޙައުލެއް ޤާއިމުކުރުމެވެ. މީގެ އިތުރުން، މަގުތަކުގައި ސްޓޯމް ވޯޓަރ ނިޒާމާއި ފަޔަރ ހައިޑްރަންޓް ނިޒާމު ޤާއިމުކުރުމަށްވެސް ވަނީ ހަމަޖެހިފައެވެ.
މި މަޝްރޫޢު ކުރިއަށް ގެންދިއުމަށް ޗައިނާ ސަރުކާރުން ވަނީ 130 މިލިއަން ޑޮލަރުގެ ހިލޭ އެހީ ދިނުމަށް ނިންމާފައެވެ. މި ނިންމުމަށް ވާސިލުވެފައިވަނީ ރައީސް ޑރ. މުޙައްމަދު މުޢިއްޒު ޗައިނާއަށް ކުރެއްވި ފުރަތަމަ ރަސްމީ ދަތުރުފުޅުގައެވެ.
ކޮންސްޓްރަކްޝަން މިނިސްޓްރީން އިތުރަށް ހާމަކުރެއްވި ގޮތުގައި، މަޝްރޫޢުގެ ދެން އޮތް މަރުހަލާއަކީ ޑިޒައިނިންގ މަރުހަލާއެވެ.
